Qarasuvbazar regional meclisiniñ iş toplaşuvı

15 Sentâbr 2011

Qarasuvbazar regional meclisiniñ 2011 senesi sentâbr 14-te Sarı suv milliy mektebinde olıp keçken iş toplaşuvında Qırımtatar halqı Meclisiniñ reisi Mustafa Cemilev iştirak etti.

Qarasuvbazar regional meclisiniñ reisi Mustafa Asaba bildirgenine köre, toplaşuvda regional meclis ve regiondaki yerli meclisler faaliyetiniñ neticeleri talil etilip, Milliy Meclis kubogına keçirilecek futbol boyunca yarışqa azırlıqnıñ ketişatı muzakere olundı.

Toplaşuvda Meclis reisiniñ regional ve yerli meclislerniñ işini idare etüv boyunca muavini Ahtem Çiygoz, Qarasuvbazar şeeriniñ başı Albert Kangiyev, Qarasuvbazar rayon ve şeer şuralarında “Qurultay – Ruh” fraktsiyasınıñ azaları, köy şuralarınıñ reisleri, regiondaki yerli meclislerniñ reisleri ve cemaatçılıq iştirak etti.

Özüniñ çıqışında Qarasuvbazar regional meclisiniñ reisi Mustafa Asaba meclisniñ yıllıq faaliyeti aqqında, bunıñ kibi de yerli meclis ve sakinler iştirakinde keçirilgen tedbirler, rayon ve şeer şuraları deputatlarınıñ işleri boyunca esabat berdi.

M.Asabanıñ aytqanına köre 2010 senesi oktâbr 31-de Qırım Yuqarı Şurası ve yerli şuralarğa olıp keçken saylavlarnıñ neticesi boyunca Qarasuvbazar rayon 11 qırımtatar deputatı ve aynı bunıñ qadar qırımtatar deputatı şeer şurasına saylandı.

Bundan da ğayrı Qarasuvbazar rayonındaki yedi köy şurasınıñ başı olaraq qırımtatarlar saylandı. Olarnıñ arasında Qarasuvbazar şeeriniñ başı Albert Kangiyev.

Toplaşuv kün tertibiniñ ekinci meselesi boyunca çıqışta bulunğan Mustafa Asaba Meclis kubogına futbol yarışı keçirüv boyunca 2011 senesi avgust 9-da alınğan qararğa binaen sentâbr 25=te Qarasuvbazar şeer stadionında matç olacaq.

“Mezkür yarışta iştirak etmek aqqında arizalarınen Lenin, Sudaq, İslâmterek ve Keriç regionları komandaları muracaat ettiler”, – dedi M. Asaba. Qarasuvbazar regional meclis toplaşuvınıñ iştirakçilerine hıtap etken Meclis reisi Mustafa Cemilev şunı qayd etti ki, Qarasuvbazar regionınıñ yerli sakinleri Qırımtatar halqınıñ öz-özüni idare etüv milliy organları aqqında nizam” boyunca saylağan Qarasuvbazar öz-özüni idare etüv organı qırımtatarlarnıñ öz-özüni idare etüvniñ şekilidir.

“Er bir qırımtatarınıñ yerli ve regional mecliske şahsiy ve cemaat meselesi boyunca muracaat etmege, meclisniñ işini mükemmelleştirüv boyunca konstruktiv teklif kirsetmege aqqı bar. Bazı adamlarnıñ Qarasuvbazar rayonında çeşit türlü “koordinatsion keñeş ve saire sahte teşkilâtlarnı” qurmaq areketleri özara añlaşılmamazlıqqa alıp kele ve regional meclis qararlarınıñ edasına keder ete. “Bu zararlı alnı tamırından yoq etmek kerek”, – dep qayd etti Meclis reisi, – çünki çoqyıllıq tecribe şunı köstere ki, Qurultay ve Meclis qararlarına köre iş tutqan yerli ve regional meclislerniñ faaliyeti mezkür “birleşmelerniñ” eali arasında işi faydasız ola.

“Birinci nevbette özara sayğı köstermek, dialognı professional seviyede alıp barmaq kerek ki, er bir qırımtatarnıñ menfaatı oğrundaki milliy siyasetni qorçalamağa ve saqlamağa imkân olsın”, – dedi M.Cemilev ve Qırımtatar halqı meclisi merkeziy ofisiniñ qapıları er kes içün açıq”, dep qoştı.