«PROVOKATORLARĞA – YOQ! YAŞASIN QIRIMTATAR HALQINIÑ BİRLİGİ!»

21 Noyabr 2011

2011 senesi noyabr 21 künü semetdeşlerimiz arasında qırımtatar halqınıñ birligi-beraberligini bozmağa tırışqan areketlerinen belli on-on beş insan tarafından qırımtatar milliy areketiniñ birligine daa bir kere ücüm yapıldı.

“Qırımtatar halqınıñ Milliy areketi veteranlarına qoltutuv mitingi” diye adlandırılğan aktsiyanıñ resmiy teşkilâtçısı “Qırım” nesili” cemaat teşkilâtınıñ reisi Ruslan Balbek 2011 senesi noyabr 18-de imzalağan yazma bildirüvni Aqmescit şeer şurasına yollap, Qırımtatar akademik muzıkalı-drama teatri yanında 3000 adamlıq kütleviy tedbir keçirüv aqqında haber bergen. Böyle tedbir keçirilecegi aqqında cemaatçılıqnı, şu cümleden Kütleviy informatsiya vastalarını da, haberdar etmek içün mezkür teşkilât ne çıqış yaptı, ne de ilân berdi.

Aynı zamanda “Golos Krıma” gazetasınıñ 2011 senesi noyabr 18-de çıqqan sanında “Sebat” cemaat teşkilâtınıñ ilânı derc olunıp, onda 2011 senesi noyabr 21 künü “Qırım” nesili” bildirge o künü ve o saatte “Sebatnıñ” idaresi “cemaatçılıqqa topraq meselesi çeziminiñ ketişatı ve yapılğan iş boyunca cemaaktçılıqnı haberdar etmek içün narazılıq meydanları iştirakçileriniñ umumiy toplaşuvı olacaq” denilgen.

Böyleliknen, yalan ilân berip, bunıñ kibi de cemaat arasında ağzaki şekilde çeşit uydurmalar, aktsiya iştirakçilerine boş vadeler tarqatuv yolunen Ruslan Balbek, Seydamet Gemici ve Rinat Şaymardanov teşkil etken siyasiy şouğa topraq narazılıq aktsiyalarnıñ on biñlernen iştirakçilerini aldap ketirmek areketi yapıldı.

Amma, teşkilâtçılarnıñ bütün bu aynecilikleri çul tutmadı. İşandırılğan 3000 adam yerine belgilengen saatte 250 adam, şu cümleden jurnalist ve militsiya hadimleri, toplandı.

Tez arada topraq meselesi çeziminiñ ketişatı aqqında açıq ve kerçek esabatnı diñlemege kelgen qırımtatarlar bir qaç marginal şahıs tarafından uydurılğan şounıñ şaatları oldılar. Olarnıñ mikrofon qarşısında maniasız bulunuvlarını temin etken militsiya küçleri muzakere etileyatqan meseleler boyunca öz fikirini bildirmege istegenlerni anda qoymadılar. Şu toplaşuvğa yetip kelgen Qırım Nazirler şurası reisiniñ muavini Aziz Abdullayev, Qırım Yuqarı Şurası Daimiy komissiyasınıñ reisi, Meclis reisiniñ muavini Remzi İlyasov, Milletlera munasebetler ve sürgün olunğan grajdanlarnıñ işleri boyunca cumhuriyet komitetiniñ reisi Edem Dudakov, milliy areket veteranı Veciye Kaşkanı mikrofonğa yaqınlaştırmadılar.

Aktsiyanıñ Ruslan Balbek, Seydamet Gemici ve Rinata Şamardanov yüzünde teşkilâtçıları tarafından böyle munafıq munasebetni körgen aktsiya iştirakçileriniñ , 50-60 adamdan ğayrı, deyerlik episi Meclis binası taba yol aldılar. Mında endi olacaq provokatsiya aqqında tanış-bilişlerinden haber alğan 200 adam toplanğan edi.

Qırımnıñ çeşit regionlarından kelgen adamlar tanışlarından Qırımtatar halqınıñ Meclisine qarşı yapılacaq provokatsiya aqqındaki bu haberni alğanlarınen Aqmescitke kelgenlerini bildirdiler. Bu acele areket ve Meclis binası qarşısında toplanğan adamlarnıñ sayısı halqımıznıñ yüksek añı ve aq-uquqlarımıznı ğayrıdan tiklemek içün küreşte öz-özüni idare etüv milliy organlarınıñ müimligini añlağanından delâlet bere.

Qırımtatar halqı Meclisiniñ binası qarşısındaki birleştirilgen mitingde Qırımtatar halqı Meclisiniñ reisi Mustafa Cemilev, Qırım musulmanlarınıñ Müftisi haci Emirali Ablayev, Qırım Nazirler şurası reisiniñ muavini Aziz Abdullayev, Meclis reisiniñ muavinleri Refat Çubarov ve Remzi İlyasov, Meclis azaları Safure Kacametova, Zevcet Qurtümerov ve Zair Smedlâyev, Qarasuvbazar sakini Asan Kubuyev, milliy areket veteranı Veciye Kaşka çıqışta bulundılar.

Çıqışta bulunğanlar semetdeşlerimizni provokatorlarnıñ qırımtatar halqını bölmek areketlerini keskin qaralamağa çağırıp, halq menfaatlarına ürmetsizlik köstergen şahıslarnıñ bozğuncılıq areketlerine qarşı halqımıznıñ ananeviy tesir usullarını qullanmaq kerekligini qayd ettiler Miting iştirakçilerine muracaat etken Qırımtatar halqı Meclisiniñ reisi Mustafa Cemilev: “Biz Qırımtatar halqınıñ Meclisine qarşı aktsiya azırlanğanından haberimiz bar edi. Vaqianıñ böyle ketişatını da bekledik, çünki bazı bir malümatlarnı elde ettik. Böyle adiseler tarihımızda endi defalarca olğandır. Qırımtatar milliy areketini bir qaç parçağa bölmek içün sovetler rejimi devrinde de çeşit areketler yapılğan edi. Belki aqılıñızda qalğandır, 1991 senesi KGBden qaçıp ketken polkovnik Aleksandr Kaçihin, “Azatlıq” radiosında çıqış yapıp, “sovet sistemi qırımtatar milliy areketine qarşı tek apshane ve lagerler yardımınen küreşmedi ve neticede esas areketke qarşı qırımtatarlar arasında üç aqıntı teşkil etildi” degen edi.

Mustafa Cemilev bugün kendilerini milliy areket veteranları diye tanıtqan bazı qırımtatarlar aynı şu provokatsion aqıntılarnıñ azaları olğanını da qayd etti.
“Qırımtatarlar Qırımğa qaytqan soñ biz (Meclis) bu insanlarnıñ olarnıñ aileleri bar, balaları mashara olmasın dep adlarını aytmadıq, çünki balalarnıñ qabaatı yoqtır. Lâkin olar bundan hulâsa çıqarmadılar”, dedi Meclis reisi ve devam etti: “Bugün bu areketler devam ete. Meclis elde etken malümatqa köre “Meclis itibarını tüşürüv ve qırımtatar halqını bölüv” işine Rusiye mahsus hızmetleri gizli küçler vastasınen reberlik ete. Olarnıñ malümatları boyunca qırımtatarlar telükeli olıp, Qırımnıñ kene de Rusiyeniñ qısmına çevrilmesine mania olalar. Em buña eñ çoq Meclis ve qırımtatarlar qarşı çıqa.

Qırımtatarlarnı bölmek içün büyük sermiya ayırıla, çeşit tedbirler keçirile. Bu işlerge qırımtatarlarnıñ vekillerini de celp etmege tırışalar. Tabiiy ki, öz işleri içün bu insanlar maddiy rağbetlendirileler. Em bu bu boş laf degil. Biz bu malümatlarnı bir qaç menbalardan teşkerdik”.

Mitingniñ soñunda onıñ iştirakçileri qırımtatar halqınıñ birligini bozmağa tırışqan provokatorlarğa qarşı “PROVOKATORLARĞA – YOQ! YAŞASIN QIRIMTATAR HALQINIÑ BİRLİGİ!” qarar metinini birağızdan tasdiqladılar.