Ukrayina Prezidenti Ukrayina milliy azlıqları ve tamır halqlarınıñ vekillerinen körüşti

23.05.2025

Mayısnıñ 22-nde Ukrayina prezidenti Volodımır Zelenskıy Ukrayina milliy azlıqları ve tamır halqlarınıñ vekillerinen körüşti. Körüşüvde azerbaycan, arap, belorus, bulğar, ermeni, gagauz, yunan, gürci, yeudiy, moldav, alman, poloniyalı, rom, rumın, türk, macar milliy toplulıqları ve üç tamır halqınıñ temsilcileri olğan qaraylar, qırımçaqlar ve qırımtatarlar iştirak ettilar.

Qırımtatarlarnı körüşüvde qırımtatar halqınıñ lideri Mustafa Cemilev, Qırımtatar Milliy Meclisiniñ reisi Refat Çubarov ve Meclis azası Eskender Bariiev temsil ettiler.

Volodımır Zelenskıy episini Halqara birdemlik ve medeniy çeşitlik kününen hayırladı.

Prezident, milliy azlıqlar ve tamır halqlarınıñ farqlı saalarda müim rol oynağanlarını qayd etti ve Ukrayina qorçalavına qoşqan issesi içün teşekkür bildirdi.

“Bu, dost Ukrayina halqlarınıñ bir çoq temsilcisi. Olar umumiy memleketimiz içün küreşeler. Men buña ayrı minnetdarım. Olarnı tek mukâfatlarnen qayd etmek degil de, er keske hatırlatmağa unutmamaq da pek müimdir: bizim çoq milletli devletimiz bar ve epimiz beraber yaşaymız. Barışıqta yaşamaq içün küreşemiz”, – dep Zelenskıy qayd etti.

Körüşüvniñ esas noqtası daa çezilmegen meselelerni muzakere etmektir. Tamır halqları qanunınıñ amelge keçirilmesi, akimiyet ve azlıqlar arasında idareniñ quvetleştirilmesi, tasil ve til meseleleri aqqında söz yürsetildi.

Qırımtatar halqınıñ lideri Mustafa Cemilev çıqışta bulunıp, Rusiye vatandaşlığını qabul etmege mecbur etilgen işğal etilgen topraqlarnıñ sakinlerini deñiştirüv cedvellerine kirsetmek müim olğanını qayd etti.

Körüşüvde Devlet başınıñ Ofisiniñ yolbaşçısınıñ muavinleri Olena Kovalska, İğor Jovkva ve Viktor Mıkıta, Ukrayina qavmiy siyaset ve vicdan serbestligi devlet hızmetiniñ yolbaşçısı Viktor Yelenskıy da iştirak ettiler.