Meclis vekilleri Stokholmda Holodomor fedalarınıñ hatırasına bağışlanğan tedbirde iştirak ettiler

23.11.2025

Bugün Stokholmda, Halqara Qırım platformasınıñ Dördünci Parlament sammitiniñ işi başlağan yerde, Ukrayinada 1921-1923, 1932-1933 ve 1946-1947 seneleri olğan Holodomor fedalarınıñ hatırasına miting olıp keçti.

Tedbirde İsveçiya akimiyetiniñ vekilleri, Ukrayina Yuqarı Şurası reisiniñ birinci muavini Oleksandr Korniyenko yolbaşçılığında ukrayin siyasetçileri, yerli ukrayin cemiyeti, em de Meclis reisi Refat Çubarov, Meclis azaları Riza Şevkiyev ve Eskender Bariiev terkibindeki Qırımtatar Milliy Meclisiniñ eyyeti iştirak etti.

Meclis reisi Refat Çubarov çıqışta bulunıp, vaqtınca işğal etilgen bütün ukrayin topraqlarını azat etmeden cenkni bitirmek ıntıluvları qabul etilmeycegini qayd etti, çünki barışıq istilâcınıñ imtiyazlarına esaslanıp olamaz.

“Rusiye-Ukrayina cenkiniñ yekünlenmesiniñ tek doğru variantı – Qırımnıñ ve Ukrayinanıñ diger işğal etilgen topraqlarınıñ işğalden azat etilmesi, em de Ukrayina devletiniñ topraq bütünliginiñ halqara seviyede tanılğan sıñırlarında bütünley ğayrıdan tiklenmesidir”.

İsveçiya parlamentiniñ vekili Martin Odal ve belli isveç iqtisatçısı ve siyasetçisi, Riksdag ve Avropa parlamentiniñ sabıq mebusı Gunnar Hokmark, Rusiye istilâsına qarşı küreşte Ukrayinağa deñişmez destegini bildirdiler.

Olar qayd ettiler ki, dünya toplulığı tek totalitar rejimlerniñ cinayetlerini hatırlamaq degil de, areket etmek kerek – sanktsiyalarnıñ quvetleştirüvi, Ukrayinağa maliyeviy ve arbiy destek, em de istilâcı devletke qarşı halqara basqı sebebinden.

Fotoresimler: Qırımtatar Resurs Merkezi