Poloniyada Umer Adamanovnıñ adını unutmaylar

22 Sentâbr 2011

Mart 22 künü Milliy Meclisniñ Tışqı alâqalar boyunca idareniñ başı Ali Hamzin ve “Köydeşler” cemaat teşkilâtınıñ yolbaşçısı İbraim Voyennıy Poloniyanıñ Yüzefovo şeerinde resmiy ziyaretnen bulındılar.

Ziyaret devamında qırımtatar vekilleri bu sene iyül 1 künü Ümer Adamanovnıñ hatırasına bağışlanıp ötkerilecek tedbir programması üzerinde Poloniya ve Litva tatarlarınıñ timsalcilerinen muzakereler ötkerdiler.

Ondan ğayrı Bilgoraya şeerindeki ülkeşınas müzeyinde Ümer Adamanov aqqında ayrı ekspozitsiyasınen tanış oldılar.

Müzey müdiri Yerji Vazskiyeviç ilân etti ki, iyülniñ 1-ne planlaştırılğan merasimge qadar partizan otrâdınıñ efsaneviy komandiri Ümer Adamanovnen bağlı bütün derc olunğan vesiqalarnıñ kopiyaları azırlanıp, tantanalı merasim künleri qırımtatar vekillerine teslim olunacaq.

Qırımtatar vekilleri Ümer Adamanovnıñ mezarlığını ziyaret etip, onıñ ruhunı duanen añdılar.

Ümer Adamanov “Mişka Tatar” lağabı ile cenkleşti. Arbiy-nemse komandalığı ise onıñ cesedi içün yüksek para mukâfatnı tayinledi. Bu qaramaniy şahs faşist Almaniyanıñ bazı planlarını dağma-dağın etti.

Doğma Yaltalı Ümer Adamanov, cesaretligi içün Poloniyanıñ eñ yüksek arbiy mukâfatnen taqdirlendi. Poloniya cemiyeti tarafından Yüzefovo şeerinde, qaraman kömülgen yerinde, abide tiklenildi, şeer soqaqlarnıñ birisine onıñ adını bergenler ve er yıl iyülniñ 1-nde qaramannıñ hatıra merasimleri keçireler.