Siyasiy mabüs Servet Gaziyev Kamçatkağa etap etildi

11 March 2025

13 yılğa maküm etilgen 64 yaşındaki siyasiy mabüs Servet Gaziyevni Petropavlovsk-Kamçatskiy şeerindeki TM-5ke alıp kettiler. Bunı “Qırım birdemligi” bildirdi.

Gaziyev qorantasınen “Zonatelekom” apishane bağ vastasınen bağlandı. Daa evel haber etilgeni kibi, onı 2024 senesi ilk qış ayınıñ 28-nde Vladimirniñ 2-nci apishanesinden çıqardılar. Bu etap eki aydan çoq devam etti. Şimdi qırımtatar evinden 12,7 biñ kilometr uzaqlıqta buluna.

Bütün bu vaqıt devamında Gaziyevniñ qorantası onen bağ tutamadıı. Tek kiçik qış ayında qırımtataı tuvğanlarına telefon etip, Habarovskta bulunğanını ve oña Kamçatkağa uçaq biletini alğanlarını bildirdi. Bundan da ğayrı, o, etap vaqtında pek yorulğanını ve suvuqlanğanını ayttı.

“Bu sene 65 yaşına kirdi. Ve o qadar yaşlı, hasta adamnı o qadar uzaq yolğa yollaylar ki, men şimdi onıñ yanına müstemlekege bile barıp olamayım… Onı evge yaqınğa [müstemlekege] yollap olamadılarmı?..”, – dep mabüsniñ qardaşı Svitlana Ablâmitova izaatladı.

Servet Gaziyev Hizb ut-Tahrirniñ “ekinci Aqmescit” gruppası davasında maküm etilgen edi. Çoqusı şahıslar 2019 senesi saban ayında Qırımda keçirilgen kütleviy tintüvler vaqtında yaqalandı. Umumen 25 adamnıñ davası baqıla. 2023 senesi qara qış ayında Cenübiy bölgeniñ arbiy makemesi bu gruppanıñ beş qırımtatarını – Servet Gaziyev, Alim Karimov, Seyran Murtaza, Erfan Osmanov ve Cemil Ğafarovnı 13 yılğa üküm etti. Cemil Ğafarov kiçik aynıñ 10-nda apishanede vefat etti.