Ukrayina tamır halqlarınıñ Birinci Kongressiniñ qırımtatar tilinde rezolütsiyası

03.02.2026

Hatırlatamız ki, ilk qış ayınıñ 2-nde Kıyivde Ukrayina tamır halqlarınıñ Birinci Kongressi olıp keçti – 150-den ziyade iştirakçini birleştirgen umumukrayin tedbirinde Ukrayina tamır halqlarınıñ vekilleri, arbiy hızmetçiler, cemaat faalcileri, devlet akimiyet organlarınıñ, diplomatik korpusnıñ, uquq qorçalayıcı toplulıqnıñ, media ve halqara teşkilâtlarnıñ vekilleri bar edi.

Ukrayina Qavmiy siyaset ve vicdan serbestligi devlet hızmeti, Qırımtatar Miliy Meclisi, Ukrayina Prezidentiniñ Qırım Muhtar Cumhuriyetindeki Temsilciligi, Qırımtatar resurs merkezi, Ukrayina qarayları birligi ve qırımtatarlar cemiyetiniñ vekilleri tedbirni teşkil ettiler.

Kongressniñ resmiy yekünlenmesi vaqtında iştirakçiler em milliy, em de halqara institutlarğa muracaat etilgen Ukrayina tamır halqlarınıñ umumiy rezolütsiyasını qabul ettiler. Vesiqada, hususan, “Ukrayinanıñ tamır halqları aqqında” Ukrayina qanunınıñ tolusınen ve semereli şekilde yerine ketirilmesi, tamır halqlarınıñ temsil organlarınıñ, hususan Qırımtatar Milliy Meclisiniñ resmen tanılması, em de Ukrayina tamır halqlarınıñ turğun inkişafı içün devlet strategiyasınıñ işlep çıqarılması ve amelge keçirilmesiniñ zaruriyeti qayd etile.

Ukrayinanıñ tamır halqları Birinci kongressiniñ Rezolütsiyasınıñ ukrayin tilinde tolusınen MINDA oqumaq mümkün.

Qırımtatar Milliy Meclisi vesiqanıñ qırımtatar tiline tercimesini azırladı (terciman – A. Patselâ, muharrir – N. Seydametova).