Özbekistandaki Rusiye medeniyet künleri çerçivesinde Rusiye Federatsiyasınıñ provokatsiya niyetleri munasebetinen Qırımtatar Milliy Meclisi Prezidiumınıñ beyanatı

23.05.2025

Qırımtatar Milliy Meclisi vaqtınca işğal etilgen Qırım Muhtar Cumhuriyetiniñ toprağında işğalli akimiyet organlarınıñ faaliyetini daima nezaret ve talil ete.

Bu munasebetnen Qırımtatar Milliy Meclisi qanunsız işğalli Qırım memuriyetiniñ vekilleriniñ 2025 senesi mayısnıñ 28-nden bozarğannıñ 2-ne qadar Taşkent ve Samarqand şeerlerinde Özbekistan Cumhuriyetindeki Rusiye medeniyet künleri çerçivesinde keçirilecek tedbirlerde iştirak etüvi aqqında haberlerge diqqat ayırdı.

Berilgen malümatqa köre, Rusiye Federatsiyasınıñ eyyetinde “Qırım Cumhuriyeti Nazirler şurası”nıñ temsilcileri olğan şahıslar, şu cümleden G.Muradov, R.Yakubov, Ç.Yakubov, em de işğalci akimiyetniñ imayesi altında çalışqan medeniy kollektivlerniñ iştirakçileri bar.

Bu tedbirlerniñ programmasına qırımtatarlarnıñ Özbekistan inkişafına qoşqan issesi aqqında almanahnıñ taqdimi, Özbekistan ögünde “qırımtatarlarnıñ hızmetleri”ne bağışlanğan abideniñ eskiziniñ taqdimi, sözde Qırım filarmoniyası artistleriniñ kontserti, em de “F. Yakubov adına Qırım müendislik-pedagogika universiteti” ve İ. Karimov adına Taşkent devlet tehnik universitetiniñ arasında añlaşmanıñ imzalanması kirsetildi.

Qırımtatar Milliy Meclisiniñ Reisi şunı qayd etmek kerek dep saya: işğalli Qırım memuriyetiniñ vekillerinen er angi resmiy ya da resmiy olmağan alâqalar, daa ziyade olarnıñ Özbekistan mustaqil devletiniñ toprağında keçirilgen tedbirlerde iştirak etmesi, Rusiye Federatsiyası tarafından Qırım işğaliniñ tanılması olaraq qabul etilecek.

Bu sebepten Qırımtatar Milliy Meclisiniñ Prezidiumı Özbekistan Cumhuriyetiniñ resmiy akimiyetine muracaat ete:

• qanunsız işğalli Qırım memuriyetiniñ vekilleriniñ, em de oña bağlı müessiseler, şirketler, kollektivlerniñ Özbekistanda ötkerilecek tedbirlerde iştirak etmesine yol bermemege;

• Ukrayinanıñ suvereniteti ve topraq bütünligine sayğı kösterüvniñ halqara seviyede tanılğan printsiplerine riayet etmege.

Qırımtatar Milliy Meclisiniñ Reisi Özbekistan Cumhuriyeti halqara toplulıqnıñ mesüliyetli azası olaraq öz vazifelerine sadıq qalacağına ve Rusiye Federatsiyası tarafından yapılğan nevbetteki provokatsiyağa lâyıq cevap bereceginden eminligini bildire.

Qırımtatar Milliy Meclisiniñ Başı

Refat Çubarov

2025 senesi mayısnıñ 23-ü

Kıyiv ş.