OSSE milliy azlıqlarnıñ meseleleri boyunca aliy komissar Astrid TORS Refat Çubarovnı Meclis reisi vazifesine saylanğanı ile hayırladı

08 Noyabr 2013

“Sayğılı cenap Çubarov, Siz Qırımtatar halqı meclisiniñ reisi olaraq saylanğanıñıznen samimiy hayırlaymız, – dep yaza öz mektübinde  OSSE milliy azlıqlarnıñ meseleleri boyunca aliy komissar Astrid TORS. Liderni deñiştirüv kibi tarihiy vaqia mürekkep bir devirde oldı”.

Meclis reisi R. Çubarov adına yazğan mektübinde Aliy komissar şunı da haber ete ki, bir qaç afta evelsi eki cami yaqınlağanı aqqındaki haberni büyük keder ile qabul eti. “Men ükümetni bu adiselerni qaralamaq ve qabaatlılarnı olduqça tez tapmaga çağırdım, – dep qayd ete Tors hanım. – Men Meclisniñ bu fesatqa berilmemek, Qırımdaki vaziyetni kerginleştirebilecek er angi adımdan vazgeçmek qararını maqulleyim. Şu munasebetnen Siziñ Qırım akimlerinen dialog qurmağa azırlığıñıznı taqdir etem”.

Aliy komissar Astrid Tors söylegenine köre o, eñ yaqın zamanda “Qırımda sürgün eilgenlerniñ qatıluvı” maruzası ile bağlı areketlerni muzakere etmek maqsadında  Aqmescitni ziyaret etecek. Maruzanı  evelki aliy komissar Knut Vollebek derc etti.

OSSE milliy azlıqlarnıñ meseleleri boyunca aliy komissar Astrid TORS  Meclis reisi Refat Çubarovğa muvafaqiyet tilep, Meclisniñ yañı reisinen birlikte semereli çalışacağına  ümüt bildirdi.