OSCE Milliy azlıqlarnıñ işleri boyunca Aliy Komissarı Knut Vollebek Meclisni ziyaret etti

26 Iyül 2012

Ukrainada iş ziyaretinden bulunğan OSCE Milliy azlıqlarnıñ işleri boyunca Aliy Komissarı Knut Vollebek iyül 26 künü Qırımğa kelip, planlaştırğan körüşüv ve konsultatsiyalarını keçirdi.

Aynı şu künü cenap Knut Vollebek ve oña refaqatlıq yapqan mesleatçıları Aleksandr Vinnikov ve Vinsent de Graf Meclis reisi, Ukraina halq deputatı Mustafa Cemilevnen körüşti. Meclis ofisinde olıp keçken bu körüşüvde Meclis reisiniñ birinci muavini Refat Çubarov, tışqı alâqalar bölüginiñ başı Ali Hamzin ve Meclis Kâtibiyetiniñ başı Zair Smedlâyev iştirak ettiler.

Bundan bir kün evelsi Knut Vollebek ve Mustafa Cemilev Ukraina Yuqarı Şurasında körüşkenleri sebebinden, Qırımda taraflar qırımtatar halqınıñ öz Vatanında aqlarını ğayrıdan tiklev, Ukrainada onıñ telükesizligini teminlev boyunca halqara forumğa azırlıqnıñ ketişatını muzakere ettiler.

OSCE Milliy azlıqlarnıñ işleri boyunca Aliy Komissarı Knut Vollebek Meclis yolbaşçılarına Kiyevde olğan körüşüvleri, şu cümleden Ukraina tışqı işler naziri Konstantin Grişçenko ile subeti aqqında malümat berdi.

Ukrain tarafı Knut Vollebek qayd etkenine köre Halqara forum keçirilmesine qoltutıp, onı keçirüv müddeti ve şekili boyunca öz tekliflerini bildirmekte.

Aynı zamanda, dey cenap Knut Vollebek, onıñ ofisi endi halqara ekspertlerni seçip aldı ve olar bir qaç ay devamında Halqara forumda baqılacaq esas meseleler boyunca mahsus tedqiqatlar alıp baracaqlar. “Böyleliknen, – dedi Knut Vollebek, – men birlikte Gaagada (2012 senesi iyün ayında) işledigim plandan memnünim, şimdi bu plan endi kerçekleşüv devrine kirmekte”.

Körüşüvniñ iştirakçileri “Milliy mensüpligine köre sürgün etilgen insanlarnıñ aqlarını ğayrıdan tiklev aqqında” qanun leyhasını ekinci oquvğa azırlavnen bağlı meselelerni de baqtılar.

Qırımtatar halqı Meclisiniñ reisi Mustafa Cemilev Aliy komissarnı onıñ şu qanun leyhasına qoltutqanı içün minnetdarlıq bildirip, ekinci oquvğa kirsetilgen qoşumca ve tüzetüvler deklarativ harakter taşıp, qabul etilgenleri taqdirde leyhanıñ mündericesini zayıflatabilecegini söyledi.

Körüşüvniñ soñunda Knut Vollebek şunı qayd etti ki, Halqara forumnı keçirüv meselesi onıñ ofisi faaliyetiniñ eñ degerli yönelişlerinden biridir. Halqara ekspertlerniñ öz vazifelerini muvafaqiyetli eda etmesi Forum keçirüv müddetini yaqınlaştırır.