Oraza Bayramı cümleñizge hayırlı olsun!

07 Avgust 2013

Mühterem Qırım müminleri!

Qıymetli vatandaşlar!

Mubarek İslâm dinimizde Alla-Taalâ ögündeki borclarımıznıñ birisini eda etmekniñ ifadesi ve onıñ yeküni, eki büyük bayramından biri olğan Ramazan (Oraza) Bayramı cümleñizge hayırlı olsun!

Muqaddes ayı devamında qaviy sabırnen tutqan orazalarıñıznı, teren iman ve temiz yürekli secde ile yapqan ibadetleriñizni, samimiylik ile becergen hayriye işleriñizni ve bergen iftarlarıñıznı Yüce Rabbimiz qabul etsin!

Bu çoq güzel Bayram munasebetinen epiñizge qaviy sağlıq, quvançlı, mabet yaşayış, işleriñizde muvafaqiyet tileymiz. Qorantalarıñızda barlıq, baht-seadet üküm sürsin. Alla bizge, milliy maqsatlarımızğa tez arada yetmekte, Özü bağışlağan Vatannıñ saibi olmaqta yardımcı olsun!

Qırımtatar Milliy Meclisi