Halqara Ana Tili kününe onlayn-imlâ

18.02.2026

Nefes teşebbüsi, kiçik aynıñ 21-nde Halqara ana tili kününe bağışlanğan qırımtatar tilinden ananeviy onlayn-imlânıñ keçirilmesi aqqında ilân etti.

Teşkilâtçılarnıñ qayd etkenine köre, sekiz yıl içinde teşebbüsniñ keçirilmesi güzel bir ananege çevirildi ve Qırımtatar tilini Qırım ve onıñ tışında sevgenlerni birleştire.

Bu sene imlânı şair, terciman ve muarrir Mayye Abdulganiyeva oquycaq.

Canlı yayın kiçik aynıñ 21-nde Qırım vaqtına köre saat 20:00-de (Kıyiv vaqtına köre saat 19:00-da) teşebbüsniñ YouTube ve Facebook saifelerinde olacaq.

Onlayn-imlânıñ yazıluv şartları:

• İmlâ latin ya da kiril urufatında, elnen, añlayışlı tarzda yazılmaq kerek;

⠀• İmlânıñ oqulması yekünlengen soñ, metinleriñiz 3 (üç) saat devamında (21.02.2026 00:00-ce) qrm.nefes@gmail.com poçta qutusına, foto ya da skan şeklinde yollanılmalı.

• Adıñızñı, Facebook/Instagram esabıñızğa bağlantını ya da email qutuñıznı belgilemek şarttır;

• Yazıları aydın oqulmağan işler ve yaramay çıqarılğan foto- ve skankopiyalar baqılmaycaq;

• Yollanılğan işler qabul etilüv vaqıtı bitkeninden bir kün keçerken, imlânıñ metini latin ve kirill urufatında “Nefes”niñ Instagram ve Facebook saifelerinde yerleştirilecek.

İmlânı hatasız yazğan iştirakçılar mukâfatlarnen taqdirlenecek. Neticeler 2026 s. saban ayınıñ 21 künü beyan etilecek.