Nyü-Yorkta Tamır halqlarnıñ meseleleri boyunca daimiy forumnıñ 12-nci oturımı başlandı

23.05.2013

Mayıs 20 künü BMTniñ Nyü-Yorktaki ofisinde Tamır halqlarnıñ meseleleri boyunca daimiy forumnıñ 12-nci oturımı öz işini başladı.

Belli ki, dünnânı 70 devletinde cemi 370 million tamır halq vekilleri yaşamaqta olıp, çoq til ve medeniyetlerni temsil etmekteler.

Oturımda Milliy Meclisten Tışqı alâqalar boyunca bölük müdiriniñ muavini, Qurultay delegatı Abduraman Egiz ve Bütündünya qırımtatarlar kongressi Koordinatsion keñeşiniñ azası Ayla Baqqallı iştirak eteler.

Mezkür oturımda tamır halqlarnıñ medeniyeti, tasili ve sağlığı meselelerine ayrıca emiyet berilecek.

“Biz tamır halqlarnıñ tasilinden başlap, zengin variyeti ve degerliklerini keregi kibi qorçalamaq, saqlamaq borclumız Tamır halqlarnıñ dünyabaqışlarına qıymet kesmek, olarnı ömürlerine dair meslelerniñ muzakeresine faal celp etmelimiz”, – denile BMT Baş kâtibi Pan Gi Munnıñ formu iştirakçilerine muracaatında.

Tamır halqlarnıñ meseleleri boyunca daimiy forum İnsan aqları boyunca komissiyanıñ tevsiyelerine binaen İqtisadiy ve İçtimaiy keñeşler tarafından 2000 senesi meydanğa ketirilip, onıñ erkânında 16 ekspert çalışmaqta.

Forumazalarınıñ bir qısmı ükümetler tarafından, diger qısmı – tamır halqlar gruppaları tarafından kösterilip, 3 yıl müddetke saylanalar.