Noyabr 21-de Kiyevde Meclis yolbaşçıları ve Ukrainada akkreditatsiya etilgen elçiler ve halqara teşkilât reberleriniñ üçünci er yıllıq körüşüvi olacaq

08 Noyabr 2013

Noyabr 21-de  Kiyevde  Meclis yolbaşçılarınıñ Ukrainada akkreditatsiya etilgen elçiler ve halqara teşkilât reberlerinen  üçünci er yıllıq körüşüvi olacaq.

Malüm ki, oktâbr 27 künü Qırımtatar halqı 6-ncı çağırılış Qurultayınıñ 1-nci sessiyasında  qırımtatar halqı  yekâne aliy vekâletli organı Milliy Meclisniñ yañı erkânı şekillendi.  

Tedbirde iştirak etmek içün  Avropa Birligi, Türkiye, AQŞ, Kanada, Asiya ve Asiy-Tınç okean regionları, Rusiye Federatsiyası, Yaponiya devletleri elçihaneleriniñ yolbaşçıları,  BMT,  Avropa Birligi, OSCE, VOT, VOOZ, YUNİSEF, OSCE milliy azlıqlar meseleleri boyunca aliy komissarı davet etildiler.
Meclis yolbaşçılarınıñ Ukrainada akkreditatsiya etilgen elçiler ve halqara teşkilât reberlerinen  üçünci körüşüvi çerçivesinde Meclis reisi Refat Çubarovnıñ brifingi olacaq.  

Kütleviy matbuat vastalarınıñ vekilleri  Meclisniñ yañı reisi ve azalarınen, bunıñ kibi de  “Larişes” (Bağçasaray) Qırım tarihı müzeyi tarafından azırlanğan “Qırımtatarlarnıñ diplomatik ve halqara alâqalarınıñ tarihı” sergisinen tanış olacaqlar.Körüşüvniñ resmiy teşkilâtçısı “Qırım inkişafı fondı” hayriye teşkilâtı,  ortağı –  “Qırım Halqara İş Adamları Birligi“ . Brifing  noyabr 21-de cumaaqşamı künü  saat 15.30-da Kiyevde Hyatt Regency Kyiv ötelinde (A.Tarasova soqağı, 5) ötkerilecek. Akkreditatsiyadan kermek zarur. Bunıñ içün  Qırımda  Meclis matbuat hızmetine  ve Kiyevde  Mariya Râbovağa  şu telefon nomerine  044 586 63 50  ya da elektron poçta vastasınen  noyabr 20 saat 17.99-ge qadar muracaat etmeli: masha.ryaba@pbn.kiev.ua