Noman Çelebicihannı añma künü

24 Fevral 2012

Belli qırımtatar şairi, cemaat ve siyaset erbabı, Qırım, Poloniya, Litvaniya ve Beyazrusiye musulmanlarınıñ müftisi Noman Çelebicihan öldürilgeniniñ 94 yıllığı munasebetinen keçirilgen merasimler çerçivesinde onıñ hatırasını añmaq içün Aqmescit cemaatçılığı 23 fevral künü İ. Gasprinskiy adına qırımtatar kütüphanesinde toplandı.

Tedbirde bulunğan Qırım Yuqarı Şurası Daimiy komissiyasınıñ reisi, Milliy Meclis reisiniñ muavini Remzi İlyasov, Cumhuriyet milletler komitetiniñ reisi Edem Dudakov, qırımtatar yazıcılar birliginiñ reisi Riza Fazıl ve digerleri öz çıqışlarında fevral 23 künü qırımtatar halqı öz Yurtunıñ aqiqiy qoruyıcısı olğan, Qırım akimiyetiniñ birinci reisi Noman Çelebicihannı millet em qayğı, em iftihar ile añğanını qayd ettiler.

Kütüphane müdiriniñ muavini Leylâ Qadırov “Antlı şeitimiz unutulmaz” kitap ve vesiqalar sergisini numayış etti.

Malümat: Noman Çelebicihan 1885 senesi Canköy civarındaki Sonaq köyünde dünyağa keldi. Başta yerli mektepte, soñra Kezlev medresesinde tasil alıp, oquvını İstanbul universitetiniñ uquq fakultetinde devam ettirdi. Aynı zamanda “Student gençler cemiyeti”niñ qurulmasında iştirak etti ve halqnı müstemleke rejiminden qurtarmaq oğrunda siyasiy faaliyette ğayret kösterdi. Cafer Seydamet ve ileri qırımtatar yaşlarınen birlikte türk inqilâbında iştirak ete.

1912 senesi oquvnı bitirgen Çelebicihan Qırımğa qaytıp kele, soñra Sankt-Peterburgğa kete ve anda rus gençlerinen tanışa.

1917 senesi Qırım müftisi, soñra Qırım Musulman İcra komitetiniñ reisi etip saylana. Qırım ükümetiniñ başı olaraq öz halqınıñ yaşayışını tüzeltmek ve milliy medeniyetni inkişaf ettirüvde faal areketlerni yapa.

Öz şiirlerini N. Çelebicihan daa pek genç eken yazıp başlay. Onıñ lirikası felsefiy tüs taşıy, teren milliy duyğularnen farq ete. Onıñ eserlerinde vatanperverlik çizgileri medh etile. “Ant etkenmen!” şiri ise qırımtatar halqınıñ gimnidir.

1918 senesi fevral 23 künü bolşevikler tarafından vahşiylerce öldürildi.