Menu 
Nevşehirde qırımtatar halqı sürgünligi qurbanlarınıñ hatırasına yadikârlıq açıldı
03 Dekabr 2011
Qırımtatar halqı Meclisiniñ reisi Mustafa Cemilev Nevşehir Qırımtatar medeniyet ve yardımlaşuv cemiyeti ve şeer akimiyetiniñ davetinen dekabr 2 künü Nevşehirde qırımtatar halqı sürgünligi qurbanlarınıñ hatırasına yadikârlıqnıñ açılışında iştirak etti.
Türkiyeniñ qadimiy Kapadokiya bölgesinde yerleşken Nevşehirge kelgen kününiñ ekinci yarısında Qırımtatar halqı Meclisiniñ reisi Mustafa Cemilev Nevşehir Qırımtatar medeniyet ve yardımlaşuv cemiyetiniñ reisi Haci Mehmet Şahin ve Amerikadaki qırımtatar diasporasınıñ vekili Rustem Borlucanen birlikte Nevşehir vilâyetiniñ valisi Abdurrahman Savaş, Nevşehir başı Hasan Yünver ve Nevşehir telükesizlik hızmetiniñ müdiri Ömer Gulurkan ile körüştiler.
Qırımtatar halqı Meclisiniñ reisi Mustafa Cemilev ilk-evelâ Nevşehir şeer akimiyetine Qırımtatar halqı genotsidiniñ qurbanlarına abide tiklevde Qırımtatar medeniyet ve yardımlaşuv cemiyetine qoltutqanları ve yardım etkenleri içün teşekkür bildirdi. Nevşehir vilâyeti valisi ve Nevşehir başı ile qonuşuv devamında Mustafa Cemilev kelecekte çeşit saalarda beraber iş alıp barmaq maqsadınen Nevşehir ve Qırım şeerleriniñ biri arasında qardaşlıq bağlarını qurmaqnı teklif etti.
Öz nevbetinde Nevşehir başı Hasan Yünver Mustafa Cemilevniñ teklifine qoltutaraq şunı da qayd etti ki, bugünde-bugün Nevşehir dünyanıñ er yerinden turistlerni, bilhassa eñ çoq Yaponiya ve Avropa devletlerinden kelgenlerni, qabul etken yıl devamında faaliyet köstergen bir turistik merkezdir. “Turistlerni bizim eñ eski qayalar ve qobalar içinde yerleşken adden tış musafirhanelerimiz celp ete. Kendilerini orta asır devrinde bulunğan kibi sezgen turistler içün 21 asırnıñ şaraitleri yaratıldı”, – dedi Nevşehir başı.
Nevşehir şeeriniñ başı Hasan Yünver Mustafa Cemilevge hıtap eterek, endi çoqtan qırımtatar halqınıñ tarihınen meraqlanğanı ve Mustafa Cemilev kibi öz halqınıñ uquqları içün küreşken efsaneviy şahısnı qarşılamaq şerefine nail olğanından ğurur duyğanının bildirdi.
Hasan Yünver bunıñ kibi de qayd etti ki, qırımtatar halqı genotsidiniñ qurbanlarına yadikârlıq qoyuv Nevşehir cemaatçılığı qırımtatar halqı küreşi tarihına qoşulğan küçük bir issedir. Nevşehir vilâyetiniñ yolbaşçıları Nevşehir Qırımtatar medeniyet ve yardımlaşuv cemiyetinen sıqı işbirlikleri devam etecegine ümüt bildirdiler.
Körüşüvniñ soñunda Qırımtatar halqı Meclisiniñ reisi şeerniñ merkezindeki “Elâk olğan askerler parkı”na keldi. Qırımtatar halqı qurbanlarına yadikârlıq işte bu yerde açıldı.
Tantanalı tedbirde 200–den ziyade insan iştirak etip, olarnıñ arasında Nevşehir vilâyetiniñ valisi Abdurrahman Savaş, Nevşehir başı Hasan Yünver, Nevşehir telükesizlik hızmetiniñ müdiri Ömer Gulurkan , AK Partisinden Türkiye parlamentinde millet vekili Murat Göktürk, Nevşehir garnizonı komandanı Turgay Aras, Nevşehir universiteti rektorı professor Filiz Kılıç, Ankaradaki Bilkent universitetiniñ professorı, belli tarihçı Hakan Qırımlı, Türkiyeniñ çeşit şeerlerinden kelgen qırımtatar dernekleriniñ vekilleri ve Nevşehir musafirleri em de sakinleri bar edi.
Türkiye ve qırımtatar milliy gimnleri yañğırağan soñ Qırımtatar halqı Meclisiniñ reisi Mustafa Cemilev Nevşehir başınen beraber Qırımtatar milliy bayrağını köterdiler..
Tedbirde bulunğanlarğa teşekkür sözlerinen muracaat etken Nevşehir valisi ve başı şunı da qayd ettiler ki, deşetli facianı başından keçirgen qırımtatar halqı nice-nice meşaqatlar esabına Vatan Qırımğa qaytıp, demokratik yolnen öz aqları içün küreşe ve birligi-beraberliginen bütün dünyağa ibret olmaqta..
Hasan Yünver qırımtatar halqına faydalı olmaq kendisi içün şeref olğanını söylep, Nevşehir qırımtatar medeniyet ve yardımlaşuv cemiyetiniñ reisi Haci Mehmet Şahinge sürgünlikte elâk olğan qırımtatarlarınıñ hatırasına yadikârlıq qoymaq teşebbüsi içün teşekkür bildirdi. “Bu yadikârlıq halqnıñ facialı tarihını unuttırmaz”, dedi Nevşehir başı.
Yadikârlıq açılışında çıqışta bulunğan Qırımtatar halqı Meclisiniñ reisi Mustafa Cemilev birinci nevbette Meclis ve bütün qırımtatar halqı adından 20 asırnıñ eñ büyük faciası qurbanlarınıñ hatırasını ebediyleştirgen yadikârlıqnı qoyuvğa isselerini qoşqanlarğa minnetdarlıq bildirdi.. “Çoq yıllar devamında Türkiye Cumhuriyeti öz Vatanına qaytayatqan qırımtatarlarına yardım elini uzata, – dedi M. Cemilev ve bugünki vaqia türk ve qırımtatar halqları arasındaki qaviy ve dostane bağnıñ isbatı olğanını qayd etti.
1944 senesi sürgünligi ve sürgünlikniñ birinci yılı deşetli şaraitler aqibetinde ketirilgen qurbanlarnıñ sayısını seslendirgen Meclis reisi Mustafa Cemilev Nevşehirde 1944 senesi mayıs 18 sürgünligi qurbanlarınıñ hatırasına yadikârlıqnıñ tiklenmesi qırımtatar halqı tarihına qoşulğan büyük issedir, dedi.
Belli ki bugünde-bugün Türkiyede qırımtatar medeniyet ve yardımlaşuv merkeziniñ areketleri sayesinde Sürgünlik qurbanlarınıñ hatırasına yadikârlıq eñ çoq sayılı qırımtatar diasporası yaşağan Eskişeerde, Gebze şeeriniñ merkeziy parkında ise İsmail Gasprinskiy eykeli qoyuldı. Türkiyedeki dernek tez vaqıtta devletniñ paytahtı Ankarada da Sürgünlik qurbanlarınıñ hatırasına yadikârlıq tiklemekni planlaştıra.
Dekabr 2 künü Nevşehir belediyesiniñ” Kapadokiya” medeniyet ve sanat merkezinde “Qaytarma” qırımtatar ansambli şeerniñ sakinleri ve musafirleri içün “Qırımtatar halq muzıkası ve oyunları” kontsertini numayış etti.
900 adamnı sığdırğan salonda iç bir boş yer yoq edi, qırımtatar sanatçılarınıñ çıqışları ise samimiy ve gürdeli elçırpmalarnen qarşılandı.
Tedbirde bulunğan Nevşehir başı Hasan Yünver Qırımtatar halqı Meclisiniñ reisi Mustafa Cemilevge “Nevşehir şeeriniñ fahriy vatandaşı” şeadetnamesini tantanalı sürette taqdim etti. “Sizni bu unvanğa taqdim etüv qararı şeer şurasınıñ dekabr 2-de olğan toplaşuvında alındı ve belediyemiz Siz kibi ulu şahısnı ülkemizde körmekten ğayet memnün”, dedi H.Yünver Mustafa Cemilevge.
Öz tarafından Meclis reisi Mustafa Cemilev ve Nevşehir Qırımtatar medeniyet ve yardımlaşuv cemiyetiniñ reisi Haci Mehmet Şahin de Nevşehir yolbaşçılarına Qırımtatar halqı Meclisiniñ teşekkürnamelerini berdiler.
3 dekabr künü Meclis reisi Mustafa Cemilev Türkiyeden Qırımğa qayttı.
