NATO Şimaliy Atlantik Şurası azalarınıñ qırımtatar halqınıñ temsilcilerinen körüşüvi

11 Iyül 2017

İyül 10 künü Ukrayinanı NATOnıñ Şimaliy Atlantik Şurası ziyaret etti. NATO birleşmesiniñ azası olğan 29 devletniñ elçileri alyansnıñ kâtibi Jens Stoltenberg reberliginde keldiler. 

Ziyaret terkibine köre, NATOnıñ Şimaliy Atlantik Şurasınıñ azaları qırımtatar halqınıñ temsilcilerinen de körüşüv keçirdiler. Körüşüvde Qırımtatar halqınıñ meselelerinden mesül Mustafa Cemilev, Milli Meclisniñ reisi Refat Çubarov, informatsiyon siyaseti boyunca nazirniñ vazifesinin eda etken Emine Cepparova, muvaqqaten işğal etilgen topraqlarnıñ suallerinden mesul nazirniñ muavini Yusuf Kurkçi, “Qırım Evi” müdiriniñ birinci muavini Alim Aliyev ve diger cemaat teşkilatlarnıñ vekilleri iştirak ettiler. 

Maruzacılardan er biri NATOnıñ Şimaliy Atlantik Şurasınıñ azalarına işğal etilgen Qırımnıñ vaziyetine dair malümat berdi, insan aq-uquqlarınen bağlı kerçek problemalarnı aydınlattı ve siyasiy taqipnin nasıl yapılğanı ile yarımadanıñ arbiy bazağa nasıl çevirilgenini añlattı. NATO azası devletlerniñ elçileri Ukrayinanıñ topraq bütünligini tolusınen desteklegenlerni beyan ettiler. Daa soñra alyansnıñ Başkâtibi Jens Stoltenberg Ukrayina Yuqarı Şurasında yapqan öz çıqışında, “NATO, Qırımnıñ Rusiye tarafından işğal etilgenini iç bir zaman qabul etmeycek. İç bir zaman”, degen sözlerni ayttı. Yuqarı Şuradaki toplaşuv Ukrayina ile NATO arasında Mahsus ortaqlıq aqqında Hartiyanıñ imzalanğanına 20 yıl tolğanı munasebetinen keçirildi. 

NATOnıñ Şimaliy Atlantik Şurasınıñ azaları soñki sefer Ukrayinanı 2008 senesiniñ iyün ayında ziyaret etken ediler.