Nariman Celâl Türkiye Cumhuriyetindeki Ukrayina Fevqulâde ve Vekâletli Elçisi olaraq tayinlendi

2025 senesi mayısnıñ 14-nde Ukrayina Prezidenti Volodımır Zelenskıynıñ 305/2025 mütenasip fermanı saytta derc etildi.

---

Nariman Celâl Türkiye Cumhuriyetindeki Ukrayina Fevqulâde ve Vekâletli Elçisi olaraq tayinlendi

2025 senesi mayısnıñ 14-nde Ukrayina Prezidenti Volodımır Zelenskıynıñ 305/2025 mütenasip fermanı saytta derc etildi.

Nariman Celâl – Ukrain Qırımtatar siyasetçisi, Qırımtatar Milliy Meclisiniñ reisiniñ birinci muavini, oca, siyasetşınas ve jurnalist.

1980 senesi çiçek ayınıñ 27-nde Özbekistannıñ Navoi şeerinde doğdı, 1944 senesi qorantası anda sürgün etilgen edi. 1989 senesi ana-babasınen beraber Qırımğa qayttı. Mektep yıllarında Qırımnıñ Canköy rayonında yaşadı.

Aliy tasilini “Siyasiyatşınaslıq” mahsuslığı boyunca İ.İ. Meçnikov adına Odesa milliy universitetinde aldı. Bundan soñ Aqmescit halqara mektebinde tarih ve uquqşınaslıq ocası, “Avdet” Qırımtatar gazetasınıñ mühbiri, “ATR” telekanalında siyasiy-analitik programmalarnıñ alıp barıcısı olıp çalıştı. Bundan ğayrı, cemaat faaliyetinde faal iştirak ete edi.

2013 senesi, Refat Çubarov Qırımtatar Milliy Meclisiniñ reisi olaraq saylanğan soñ, Nariman Celâl onıñ muavinlerinden biri, haber-analitik bölüginiñ yolbaşçısı oldı.

2014 senesi Qırım Rusiye tarafından işğal etilgen soñ yarımadada ve onıñ tışında Qırımtatar halqınıñ aqlarını faal sürette qorçalamağa devam etti.

2021 senesi ilk küz ayınıñ 4-nde Qırımdaki işğalli akimiyetniñ vekilleri bir sıra tintüv keçirip, Celâl ve daa dört Qırımtatarnı tuttılar. FSB hadimleri onı qollarını buğavlarnen bağlap ta ve başına çuval taqip tuta, ruhiy basqı yapa ediler.

Daa soñra Rusiye FSBsiniñ bildirgenine köre, Celâl, Aqmescit civarındaki Anğara (Perevalne) yanındaki 2021 senesi arman ayınıñ 23-nde yüz bergen gaz borusınıñ patlatılmasında şübheli sayıla.

2022 senesi ilk küz ayınıñ 21-nde Nariman Celâlnı sert rejimli müstemlekede 17 yılğa, 700 biñ ruble para cezasına ve 1,5 yılğa azatlıqtan marum etüv cezasına mahküm ettiler, soñra Krasnoyarsk vilâyetiniñ Minusinsk şeerine etap ettiler.

Apislikte Celâl Rusiye işğalinden soñ Qırımdaki vaziyetni talil etken maqaleler yaza edi.

2024 senesi ilk yaz ayınıñ 28-nde Nariman Celâl Ukrayinağa qaytıp oldı. O, Ukrayina ve Rusiye arasında 53-ünci deñiştirüv çerçivesinde Rusiye esirliginden azat etildi.

2024 senesi ilk qış ayınıñ 20-nde Ukrayina prezidenti Volodımır Zelenskıy Nariman Celâlnı Türkiyedeki Ukrayina elçisi olaraq tayinlegenini ilân etti.