Nariman Celâl rus esirliginden azat etildi

28 Iyün 2024

_{Foto: Elvina Seitbullaeva}

Biz bu quvançlı haberge bir qaç kün evel, bozarğan aynıñ 26-nda öz Telegram kanalımda qayd etkenim kibi, bekledik.

Yüce Allah Nariman Celâlnı, onıñ qorantasını, epimizni merhametsiz qaldırmadı!

Şimdi endi, Ukraina prezidenti Volodımır Zelenskıyğa köre, dostumız, qardaşımız ve zenaatdaşımız, Qırımtatar Milliy Meclisiniñ başınıñ birinci muavini Nariman Celâl tek azatlıqta degil, Ukrainada olğanını ilân etmek mümkün!

Tafsilâtlıca aytıp olamayım, amma eminliknen ayta bilem ki, Ukraina Kremlniñ bütün mabüslerini azat etmek içün küreşti ve küreşe.

Ukraina vekâletli organları tarafından siyasiy mabüslerniñ azat etilüviniñ çeşit variantları ve formatları teklif etile, şu cümleden, siyasiy mabüslerniñ sağlıq alı ve yaşı, olarnıñ çağına yetmegen balaları ve baqmağa muhtac olğan qart ana-babalarınıñ mevcudiyeti ve ilâhre diqqatqa alına.

Qırım siyasiy mabüsleirniñ azat etilmesi meselesi farqlı devletlerniñ, halqara siyasetçilerniñ, ahlâqiy ve maneviy liderlerniñ iştirakinen devam ete…

Lâkin Rusiye tarafı Kremlniñ mabüsleri – Qırım sakinlerini azat etmege/deñiştirmege red ete.

Nariman Celâlnıñ azat etilmesi bir sıra şart ve sebeplerniñ tesadüfi neticesinde oldı, Rusiye tarafı, Ukraina tarafından kerekli insanlarnı azat etmesini talap etip, bu qararnı qabul etmege mecbur oldı.

Ukraina tarafınıñ bütün muzakerecilerine, şu cümleden Ukrainanıñ şimdiki mudafaa naziri Rustem Umerovğa, Kremlniñ mabüsleri – Qırım sakinlerini azat etmek içün  yapqan ğayretleri içün teşekkürler bildiremiz.

Kremlniñ bütün qırımtatarlar ve qavmiy ukrainalılarnı azat etmesi içün Ukraina prezidenti Volodımır Zelenskıynıñ şahsiy ğayretleri, Qırımtatar halqınıñ lideri Mustafa Cemilev ve Qırımtatar Milliy Meclisinen devamlı işbirligi içün oña pek minnetdarmız.

Dostumız, qardaşımız Nariman Celâlnıñ azat etilmesiniñ sevincini onıñ tuvğanları, dostları, arqadaşlarınen paylaşqanımızda, Kremlniñ er bir mabüsi – Qırım sakinini azat etmek içün ilerideki ğayretlerimizniñ müimligini añlaymız.

Vatanına ve halqına olğan sevgisi ve sadıqlığı içün rus işğalcileri tarafından azatlıqtan marum etilgen cesür ve ruhu bozamağ vatandaşlarımızğa siziñ azatlığıñız içün elimizden kelgenini yapmağa devam etecegimizni söz beremiz.

Şübesiz ki, Ukraina devleti, ortaq devletleri ve, elbette, rus duşmanına qarşı cenkleşken bölüklerinde qırımtatarlar da olğan Ukraina Mudafaa quvetleri yardımınen, Ukrainanıñ Qırım üzerindeki devlet suvereniteti ğayrıdan tiklenecek ve biz epimizni tuvğan Qırımda quçaqlay bilirmiz.

Yaşasın Qırımtatar halqı!

Ukrainanıñ şan-şerefi olsun!

Refat Çubarov,

Qırımtatar halqınıñ başı

2024 senesi bozarğan aynıñ 28-i

 Kıyiv ş.