Ukrayina Tış işler nazirligi ve Qırımtatar Milliy Meclisi Kıyivde umumiy iftarnı keçirdiler

06.03.2026

Saban ayınıñ 6-nda Ukrayina Diplomatik akademiyasında Ukrayina Tış işler nazirligi ve Qırımtatar Milliy Meclisi “Qırım cebesi” birleşken teşebbüsiniñ yardımınen teşkil etken iftarnı keçirdiler.

Tedbirde musulman memleketleriniñ diplomatik missiyalarınıñ vekilleri, Ukrayina havfsızlıq ve mudafaa quvetleriniñ arbiy hızmetçileri, Qırımtatar Milliy Meclisiniñ azaları, jurnalistler ve cemaat erbapları iştirak ettiler. Tış işler nazirligi tarafından Ramazan ayında iftaranıñ keçirilmesi er yıl olğan adet oldı, bu em İslâm dinini kütken Ukrayina vatandaşları, em de bütün ukrayin cemiyeti içün müimdir.

Musafirlerni Ukrayina tış işler naziri Andriy Sıbiğa hayırladı, bundan soñ iftarda iştirak etkenler Ukrayina qorçalayıcılarını ürmetnen añlmaq içün hatıra daqqası olıp keti ve memleketni rusiye istilâsından qorçalağan arbiy hızmetçilerge qol tutqanlarını bildirdi.

Tedbirde Qırımtatar Milliy Meclisiniñ reisi Refat Çubarov çıqışta bulunıp, Rusiye-Ukrayina cenki ve Qırım işğali şaraitinde Ramazan ayınıñ müimligini qayd etti:

“2014 senesi kiçik ayda Rusiye orduları tarafından Qırımnıñ işğalinen başlanğan ve endi on üçünci yıl devam etken Rusiye-Ukrayina cenki vaqtında Ramazan – ruhnıñ, merhametniñ sınavı, aynı zamanda – aqiqat ve mesüliyetlik vaqıtıdır”.

Meclis reisi devletni rusiye istilâsından qorçalağan Ukrayina arbiy hızmetçilerine minnetdarlığını bildirdi.

“Bizim mesüliyetimiz – islâm dinini kütken er bir Ukrayina vatandaşınıñ mesüliyeti – Ukrayinanıñ suvereniteti ve topraq bütünligini er taraflama qorçalamaqtır”.

İftar vaqtında iştirakçiler vaqtınca işğal etilgen yarımadada Rusiye apishanelerinde bulunğan qırımtatarlar aqqında da hatırlattılar.

“Bugün Qırımda Ramazan ayı tintüvler ve taqiplernen keçe. Qardaşlarımız yalıñız öz halqına, tuvğan toprağı olğan Qırımğa ve Ukrayina devletine sadıq qalğanları içün iftarnı apishanelerde keçireler”.

Aynı zamanda Refat Çubarov şunı qayd etti ki, Qırımnıñ azat etilmesi adaletli barışıqnıñ açarıdır.

“Qırım, acımıznen beraber, cenkni toqtatmaq, adaletli ve devamlı barışıqnı tesis etmek içün anahtar ola. Biz eminmiz: Avropada adaletli barışıqqa yol Qırım yarımadasınıñ işğalden azat etilmesinden başlana”.

Diplomatik korpusnıñ iştirakinen umumiy iftarnı keçirmek endi müim bir anane oldı, bu dinlerara ürmet, ukrayin cemiyetiniñ birligi ve Ukrayinanıñ azatlıq ve topraq bütünligi oğrunda küreşine qol tutuvnıñ timsali ola.