Mustafa Cemilevniñ Türkiye Cumhurbaşqanı Recep Erdoğan ile körüşüvi

05 Iyül 2017

İyül 4 künü qırımtatar halqınıñ yetekçisi, Ukrayina Prezidenti yanında qırımtatar halqınıñ meselelerinde mesül Mustafa Cemilev Türkiye Cumhuriyeti Cumhurbaşqanı Recep Tayyip Erdoğan ile körüşüvi olıp keçti. Körüşüvde Mustafa Cemilevniñ mesleatçısı Rustem Umerov ve Milli Meclis Reis Hızmetiniñ reberi Arsen Jumadilov da iştirak ettiler. 

Bir saatten ziyade devam etken körüşüv esnasında Mustafa Cemilev, Qırımdaki aktual vaziyet aqqında malümat berip, insan aq-uquqularnıñ nasıl ihlâl etilgeni ve Rusiye tarafından yarımadanıñ qanundan tış istilâsınen razı olmağan qırımtatar ve diger Ukrayina vatandaşlarnıñ nasıl quvğulıqqa oğrağanlarını añlattı. Qırımtatar halqnıñ yetekçisi, Kremlniñ siyasi mahpuslarını keçiktirmeyip mutlaqa azat etmege kerek olğanını ve Qırımtatar Milli Meclis vekillerniñ Qırımğa kiriş yasaqlarnıñ lağu etilmesinin zaruri olğanını urğuladı. 

Aynı zamanda o, Ukrayinada qırımtatar halqınıñ aqlarını qorçalav maqsadınen Ukrayina Anayasasına deñişmelerniñ kirsetilmesi içün Prezident Petro Poroşenko tarafından kösterilgen teşebbüsni taqdirnen añdı. 

Türkiye Cumhuriyetniñ yolbaşçısı Recep Erdoğan öz nevbetine qırım tatarlarnıñ liderini ğayet sıcaq ve samimiy sürette selamladı ve öz şahsında Türkiye Cumhuriyeti adından qırımtatar halqını eksiksiz ve şübesiz desteklegenini beyan etti. Cumhurbaşqanı Erdoğan, halqara qanunları tarafından belgilengen Ukrayinanın sıñır bütünliginen bağlı öz qaviy turuşınıñ deñimegenini urğuladı. O bildirgenine köre, Türkiye akimiyeti türk gemilerniñ Qırım limanlarına kirmemeleri içün kerekli tedbirlerni almaqta.  Recep Erdoğan ayrıca, Ukrayina musulmanlarnıñ birleşmesini temsil etken ve Qırımtatar Milli Meclisniñ teşebbüsinen Kyivde inşaat etilmesi közde tutulğan merkeziy caminiñ inşaatı leyihasına qol tutqanını ayttı. 

Mustafa Cemilev Türkiye Cumhurbaşqanına destegi içün teşekkür etip, Qırımnıñ işğalini ve Rusiyeniñ bunı aqlama ıntıluvlarına qarşı Türk devleti köstergen şartsız ve şeksiz munasebetniñ qırımtatarları içün pek müim olğanını beyan etti. 

Şunı da hatırlatmaq kerek ki, bu künleri Milli Meclisniñ reisi Refat Çubarov NATO Parlament assambleyasınıñ yolbaşçıları ve azaları ögünde çıqışta bulundı. Aynı vaqıtta o, Qaradeñiz iqtisadiy işbirligi teşkilâtı (OBSEC) Parlament birleşmesiniñ çalışmalarına qoşulmaq maqsadınen İstanbulda bulunmaqta.