Mustafa Cemilevniñ fikrince 2012 senesi dekabr 1 adiseleri akimiyetniñ iştirakisiz olmağandır

03 December 2012

Qırımtatar halqı Meclisiniñ reisi, Ukraina halq deputatı Mustafa Cemilev dekabr 1-ge keçer gecesi Molodöjnoye qasabası yanında “narazılıq tarlasında” qırımtatarlarnıñ 100-den ziyade muvaqqat evçiklerniñ yıqtırılması ve Cuma cami qurulacaq yerniñ qaravulına ücüm etilmesi biri-birinen bağlı olıp, bu işte akimiyetniñ de qolu barlığı sezile, degen fikirni bildirdi “Krım.Kommentarii” İnternet saytına.

“Tam aytıp olamamız, amma buña beñzey. Birisinde olmasa da, ekincisinde olarnıñ yüzleri körüne. Çünki kazaklar kelmezden evel militsiya kelip, anda adamlarnıñ olğanı-olmağanınen meraqlanğan. Soñra militsiya refaqatlığında kendilerini kazak diye adlandırğan kimseler kelip evlerni bozalar, tatarlar kazaklarnıñ esabını bermesin, dep adise yüz bergen yerni militsiya sarıp ala”, – dey Mustafa Cemilev.

Reisniñ sözlerine köre, adise akimiyetnen añlaşıp yapılğanından militsiya hadimleriniñ çetten seyir etip turğanları delâlet bere.

“Bu kimge kerek? Akimiyetke bu ne içün kerek? Degenlerine köre, marginallardan birisi yerli deputatlıqqa saylanmaq isteyip, şovinistik, rus tilli saylavcılar ögünde kendisini qaraman etip köstermek istey”, – dey Mustafa Cemilev. – Bu vaziyette tertip qoruv organlarınıñ areketke keçmesi ya da keçmemesi er şeyni açıq kösterir. Bu bozğuncılıq iştirakçileri cevapkârlıqqa çekilmeliler. Eger bu insanlarğa nisbeten iç bir türlü ceza qullanmasa, demek olar akimiyetnen kelişip iş tuttılar. Qırım Yuqarı Şurasınıñ deputatı olğan, “Rus birligi” firqasınıñ yetekçisi Sergey Aksönov matbuatta açıqtan- açıq mesülietni boynuna alğanı da akimiyetnen kelişilgeniniñ isbatıdır”.

Hatırlatamız ki, noyabr 30-dan 1 dekabrge keçer gecesi Aqmescit rayonınıñ Molodöjnoye qasabasınıñ yanında bellisiz şahıslar “narazılıq tarlasında” qırımtatarlarnıñ muvaqqat evçiklerini yıqtırıp, Cuma cami qurulacaq yerniñ qaravulına ücüm ettiler.