Mustafa Cemilev: Yarımadanıñ yolbaşçıları qırımtatarlarnen çatışmalarnı planlaştırğan olsalar, demek olar «doğru yoldalar»

23 Mart 2014

Ukraina halq deputatı, Meclisniñ sabıq reisi Mustafa Cemile Qırım akimleriniñ Qırımda bulunmasını yasaq ettigi halq vekilleriniñ “qara cedvelini” tizüv areketini keskin tenqidge oğrattı

Cemilev mart 23 künü “İnter” telekanalına bildirgenine köre, böyle qararlar Rusiye prezidentinden degil de, Qırım parlamentiniñ tarqatılması içün rey bergen halq deputatlarından intiqam almağa tırışqan yerli akimlerden kele.

“Bugün muhtariyet akimiyetiniñ başına keçkenler tekmil abdallar. Olar bir qaç adım ögdekini körmeyler. O ya da bu insanlarnıñ kelmesini yasaqlamaq Pütinden kelgen emir, dep bellemeyim. Andaki ekspertler biraz aqıllıca”, – dedi Cemilev.

O şunı da qayd etti ki, onıñ Qırımğa kelmesini yasaqlayabilecekleri kendisini coşturğan. “Men ep bir anda barırım”, – dep işandırdı qırımtatarlarnıñ lideri.

Halq vekili “Eger yarımadanıñ yolbaşçıları qırımtatarlarnen çatışmalarnı planlaştırğan olsalar, demek olar “doğru yoldalar”, dedi. Cemilev İnter telekanalına Qırımnı endi biñge yaqın insan terk etkenini bildirdi.

“Qırımtatarlar arasından bu esasen qadınlar ve balalardır. Erkekler qaldılar”, – dedi o.