Mustafa Cemilev ve Gennadiy Moskal Qarasubazar rayonındaki Sarısuv qasabasınıñ sakinlerinen körüştiler

12 September 2012

2012 senesi sentâbr 11 künü Meclis reisi, Ukraina halq deputatı Mustafa Cemilev Ukraina halq deputatı Gennadiy Moskal ile beraber Qarasubazar rayonındaki Sarısuv qasabasınıñ sakinlerinen körüştiler.

Körüşüvde bunıñ kibi de Ukraina halq deputatlığına 8-nci saylav dairesinden namzetini köstergen Eskender Bariyev de bulundı.

Mecli reisi Mustafa Cemilev Qarasuvbazar rayonı sakinlerine hıtap eterek, oktâbr 28-de Ukraina halq deputatlarını saylav keçirilip, olarnıñ neticelerine köre Ukraina parlamenti şekillenecegini hatırlattı.

Bu munasebetnen, 2012 senesi iyül 20-22 künleri Aqmescitte olıp keçken U çağırılış Qırımtatar halqı qurultayınıñ 4-nci sessiyasında qurultay delegatları “Ukraina halq deputatlarını saylav ve qırımtatarlarnıñ öz-özüni idare etüv milliy organlarınıñ vazifeleri aqqında Qurultay qararı”nı qabul etken ediler. Qararğa binaen qırımtatarlarnıñ oktâbr 28-de birlikteki pozitsiyası ve bu qararnıñ edasını teminlemek vazifeleri belgilengen edi.

Mustafa Cemilev şunı da qayd etti ki, 2012 senesi iyül 27-de “Batkіvşçina” Birleşken muhalifet ve Qırımtatar halqınıñ Meclisi Yuqarı Şurağa saylavlarda iştirakine dair ve U11 çağırılış Yuqarı Şurasında Birleşken muhalifet cedvellerine Meclis belgilegen namzetler vastasınen işbirlik boyunca müşterek beyanat imzalanğan edi.

Meclis reisi semetdeşlerni “Batkіvşçina” Birleşken muhalifet siyasiy küç cedvelleri boyunca Ukraina halq deputatlığına çoqmandatlı dairelerden kösterilgen namzetlerge, bunıñ kibi de Qırımda bir mandatlı dairelerde “Batkіvşçina” siyasiy küçünden öz namzetlerini köstergen 2-nci saylav dairesinden Nariman Celâl, 10-ncı saylav dairesinden Ahtem Çiygoz, 3-nci saylav dairesinden Vladimir Şklârğa qoltutuvda birlik olmağa çağırdı.

Sarısuv qasabasınıñ sakinlerinen olğan subette Meclis yolbaşçısı devletteki siyasiy ceryanlarğa baqmadan qırımtatar halqınıñ vekâletli organı Qırımdaki bütün qasaba ve köylerde yaşağan semetdeşlerimizni eñ çoq raatsızlağan meselelerni ögrenmek boyunca faaliyetini devam ettirgenini söyledi.