Mustafa Cemilev Vasiliy Cartı vefatı munasebetinen taziye bildirdi

17 Avgust 2011

2011 senesi avgust 17 künü  Qırımtatar halqı Meclisiniñ reisi, Ukraina halq deputatı Mustafa Cemilev Qırım Muhtar Cumhuriyeti Nazirler Şurasınıñ reisi Vasiliy Cartınıñ vaqıtsız vefat etkeni  munasebetinen taziye bildirdi

Meclis yolbaşçısı Mustafa Cemilev, onıñ birinci muavini, Bütündünya qırımtatar kongressiniñ prezidenti Refat Çubarov, Meclisniñ tışqı alâqalar bölüginiñ başı Ali Hamzin, Meclisniñ Topraq komissiyasınıñ başı Zevcet Qurtümerov, Meclis Kâtibiyetiniñ başı Zair Smedlâyev, Meclisniñ informatsion siyaset ve cemaat teşkilâtlarınen alâqalar bölüginiñ başı Şevket Kaybullayev, “Qırım” hayriye fondunıñ reisi Riza Şevqiyev avgust 17 künü Qırım Nazirler Şurasını ziyaret etip, Qırımtatar halqı Meclisiniñ adından taziye yazıp qaldırdılar. 

Qırımtatar halqı Meclisiniñ reisi Mustafa Cemilev Nazirler şurasınıñ “Taziyeler kitabı”nda Vasiliy Cartınıñ yaqınları ve aqrabalarına şu sözlerni yazdı: 

“Qırımtatar halqı Meclisinde Qırım Muhtar Cumhuriyeti Nazirler Şurasınıñ reisi Vasiliy Cartınıñ vaqıtsız vefat etkeni aqqındaki kederli haberni büyük qayğı ile qabul ettiler.

Er angi vaziyette öz fikirini açıq bildirgen Vasiliy Cartı em insan, em yolbaşçı olaraq mürekkep problemlerni al etüvde Qırımda yaşağan bütün insanlarnıñ menfaatlarına uyğun yollarnı, er tarafqa kelişken bir usulnı tapmağa bile edi.  Bunıñ kibi de Vasiliy Cartı kendini adaletli qararlarnı qabul etmege iqtidarlı reber olaraq kösterdi. Aqmescitte Cuma cami qurucılığı içün yer ayıruv  boyunca qararı bunıñ isbatıdır. 

Qırımtatar halqı Meclisiniñ adından Vasiliy Cartınıñ apansızdan ve vaqıtsız vefat etkeni  munasebetinen onıñ yaqınları, aqrabaları, dostları ve meslekdelerine teren taziye bildirem”.

Qırımtatar halqı Meclisiniñ reisi,

Ukraina halq deputatı

Mustafa Cemilev

2011 senesi  avgust 17