Mustafa Cemilev: «Ukrainanıñ 2013 senesine Devlet bücetinde qırımtatarlarnıñ meselelerine 50 million grivnâdan az közde tutulmamalı»

05 December 2012

Ukraina Prezidenti

V.F. Yanukoviçke

Ürmetli Viktor Fedoroviç!

Ukraina Yuqarı Şurasınıñ muzakeresine Ukraina Nazirler Kabineti tarafından berilgen “Ukrainanıñ 2013 senesine devlet büceti aqqında” Ukraina qanunı leyhasınıñ “Ukraina topraqlarından sürgün etilgen qırımtatarlar ve diger millet vekilleriniñ yerleştirilmesi” (masraflarnıñ programm tasnif kodı 2501120) olğanı-olacağı 10 million 928 biñ grivnâ közde tutula, olarnıñ 5 millionı kapital masraflarğa, 5 million 928 biñi ise içtimaiy-medeniy yöneliş tedbirlerine qararlaştırılğan.

Aynı zamanda mezkür tedbirlerge pek az miqdarda sermiya ayırılğanı sebebinden sürgünlik yerlerinden Vatanğa qaytqan qırımtatarlarnıñ yerleştirilmesinen bağlı pek çoq problem toplandı.

Meselâ, Qırımda qırımtatarlar toplu yaşağan 300 qasabadan ancaq 65 fayızı içimlik suvnen, 30 fayızı gaznen, 87 fayızı elektrik energiyasınen teminlenip, deyerlik iç bir qasabada töşelgen yol, kanalizatsiya, mektep, balalar bağçası, feldşer-akuşerlik noqtaları yoqtır.

Ukraina Nazirler Kabinetiniñ böyle munasebeti mesülietsiz ve attaki alaycıdır.

Madamki, Ukraina Devlet Büceti birinci oquvda qabul etilgen eken, Sizden, insan aqları ve serbestliginiñ kefili olaraq, Ukraina Nazirler Kabinetine işbu meseleler boyunca evel aldığı qararlarını, cümleden Ukraina Nazirler Kabinetiniñ 2012 senesi iyün 6-da qabul etken “Ukraina topraqlarından sürgün etilgen ve Ukrainağa yaşamaq içün qaytıp kelgen qırımtatarlar ve diger millet vekilleriniñ yerleştirilmesi, ukrain cemiyetine qatılması boyunca 2010 senesine qadar programma edasınıñ müddetini devam ettirmek aqqında” qararını eda etmelerine dair buyruqlar bermeñizni rica etem.

Ukraina Ükümetiniñ Qararına muvafıq Ukrainanıñ 2013 senesine bücetinde qırımtatarlarnıñ meselelerine 50 million grivnâdan az ayırılmamalı.

Ürmet ile

Ukraina halq deputatı Mustafa Cemilev