Mustafa Cemilev Ukrainadaki Yaponiya elçiligini ziyaret etti

17 Sentâbr 2011

Mustafa Cemilev Ukrainadaki Yaponiya elçiligini ziyaret etti ve Yaponiyada yüz bergen felãketler munasebeti ile yapon halqına öz destek ve taziyelerini bildirdi.

2011 senesi 17 mart künü qırımtatar Meclis reisi Mustafa Cemilev Yaponiya elçiligini ziyaret etti.

Ukrainada Yaponiyanıñ Fevqulade ve Vekãletli elçisi İdzava Tadaşi beynen körüşkende Mustaf Cemilev Yaponiya imperatorı Akihito bey ve Yaponiya baş-naziri Naoto Kanu beyniñ adlarına taziye mektübüni teslim etti.

Bundan da ğayrı, Mustafa Cemilev Ukrainada Yaponiya elçiliginde resmiy açılğan Yuvaş okean zelzelesi qurbanlarınıñ hatırasına Matem kitabında bütün yapon halqına ve elãk olğanlarnıñ tuvğanlarına taziye sözlerini yazıp qaldırdı.

Yaponiya İmperatoru Akihito beyge
Yaponiya baş-naziri Naoto Kanu beyge

Tabiat felãketleri neticesinde yapon halqınıñ tarihında yüz bergen bu ağır künlerde bütün qırımtatar halqı adından yapon halqına, Yaponiya akimiyetine, elãk olğanlarnıñ qorantalarına teren taziyemizni bildiremiz. Tabiat afatınıñ aqibetlerini yaşap keçirilmesinde yapon halqı, Yaponiya akimiyeti tarafından numayış etilgen cesürlik ve birleşüvleri Yaponiya yañıdan gürleşeceginiñ ve yapon halqınıñ bütün insaniyetlikniñ inkişafına büyük isse qoşacaqlarınıñ kefaleti olğanına eminim.

Sürgünlikten soñ öz ana vatanına qaytqan qırımtatar halqı yapon milleti içün bu ağır künlerde qazalanğan qorantalardan 50 adamnı qabul etmege azır olğanını bildirem. Ağır sınavlardan keçmege mecbur olğan balalar bizim topraqlarımızda özlerini rahat duymaları içün elimizden kelgenini yaparmız. Olar bizde istegenleri qadar buluna bilirler, vatandaşlarımıznıñ samimiyligi ve itaatı altında olurlar.

Qırımtatar Meclis reisi, Ukraina halq deputatı Mustafa Cemilev
17 mart 2011 senesi