Mustafa Cemilev: Türkiye Baş naziri Recep Erdoğanğa sanki menim adımdan yazılıp, Milli Firqa saytında yayınlanğan mektüp sahtedir

28 May 2013

Milliy Firqa saytında sanki Milliy Meclis reisi, Ukraina halq deputatı Mustafa Cemilevniñ adından Türkiye Baş naziri Recep Erdoğanğa yazılğan mektüp sahtedir

“Meclis blankında resmiy mektüp olaraq kösterilgen yazı asılında sahtedir. Böyle uydurmanıñ müellifleri “şaşırtıcı haber” olaraq köstermege tırıştığı bir çoq şeyler aqiqatqa iç uymay”, – dedi Meclis reisi Mustafa Cemilev.

Meclis reisi bunıñ kibi de dedi ki, sahte yazılarnı uydurğan şahıslarnıñ maqsadları qavğa-dava çıqarmaq olğanını mektüpteki bir sıra yañlışlar köstere.

“Meclis kâtibiyeti endi çoqtan Meclis blanklarınıñ yañı şekilini qullanıp, sahte mektüpte kösterilgen nomer ve vaqtı boyunca Mecliste böyle mündericeli iç bir mektüp qayd etilmegen, – diye tasdiqladı M.Cemilev. – Bundan da ğayrı 2012 senesi noyabr 13-te № 251-01 nomerli mektüp – bu Qırım Nazirler Şurası yanında Topraq komissiyasınıñ azası, menim yardımcım-mesleatçım Zevcet Qurtümerovnıñ imzasınen Molodöjnoye köy şurası reisiniñ vazifesini eda etici O.Basenkoğa topraq meselesi boyunca yollanılğan mektüptir”.

M. Cemilevniñ sözlerine köre, kendisini Mecliske muhalifet olaraq köstergen cemaat teşkilâtınıñ saytında basılğan sahte mektüp savadsız ve pek çoq hatalarnen yazılğan, em Türkiye Baş naziriniñ, em Meclis reisiniñ vazifesi ve adı yañlıgş yazılğan.

“Mektüp yazılğan vaqıt ve onıñ nomerini Meclis kâtibiyetinde elnen yazıla, sahte mektüptekisi ise bilgisayarda basılğan, – devam etti Cemilev. – Metinni oqurken, öyle fikir kele ki, sahte mektüpniñ müellifleri türkçege bilgisayar tercimanı vastasınen çevirgenler”, – dedi M. Cemilev.

Meclis reisi şunı da bildirdi ki, Türkiye Baş naziri Recep Erdoğanğa 2012 senesi sentâbr 13-te mektüp yazıp, onıñ nomeri böyle edi: № 225-03/01.

“Mezkür mektüpni kendim şahsen yazdım ve Türkiye Baş naziri Recep Tayip Erdoğan Meclis ile resmiy körüşken vaqıtta yani Yaltada 2012 senesi sentâbr 13-te bivasta eline berdim, – dedi Cemilev. – № 225-03/01 raqamlı 2012 senesi sentâbr 13-te yazılğan mektüpte Qırımda bir sıra medeniy ve içtimaiy programmalarnıñ kerâçekleşmesi, cümleden milliy mektep ve sürgünden qaytqanlar içün mesken evler qurucılığı, QMPU maddiy bazasınıñ pekitilmesi, Büyük Cuma cami qurucılığı meseleleri aks ettirildi.