Mustafa Cemilev “Türk dünyasına hızmeti içün” mukâfatınen taqdirlendi

26 Sentâbr 2011

Meclis reisi, belli uquqqoruyıcı  Mustafa Cemilev Türkiye yazıcıları ve sanat erbapları birligi tarafından “Türk dünyasına hızmeti içün” mukâfatına taqdim etildi. Mustafa Cemilev qırımtatar halqınıñ meselelerini zorbalıqsız çezmek, qardaş  devlet ve halqlarnı birleştirmek oğrunda ğayelerine Türkiyede yüksek qıymet kesildi.

2011 senesi aprel 5-te Universitet rektorı Fırat Ahmet Feyzi Bingöl  reberliginde mukâfat saipleriniñ namzetlerini tasdiqlav boyunca komissiya toplaşuvında 2010 segnesi içün mukâfatnı Qırımtatar halqı Meclisiniñ reisi, Ukraina halq deputatı Mustfa Cemilevge bermek qararını alğan edi.  “2010 senesi mukâfatını Qırımtatar halqı Meclisiniñ reisi, Ukraina halq deputatı Mustafa Cemilevge bermek qararı birağızdan qabul etildi. 21-nci asırda, insan degerligi ve uquqları  er şeyden ziyade qıymetli sayılğanda bir çoq türkiy halqlar aqsımlana ve adaletsizlikke oğratılmaqta. Böyle halqlardan biri qırımtatarlardır. Qırımtatarlarnıñ lideri öz halqınıñ serbestligi ve demokratiya içün usanmadan küreşken ve hayatta eken efsane olğan Mustafa Cemilevdir”, – qayd etile komissiya qararında.

Taqdirlev merasimi Elâzığ şeeri Medeniyet merkezinde  19-ncı Halqara Hazar şiiriyeti aqşamı çerçivesinde sentâbr 24 künü  ötkerilip, merasimde şeer güberantorı  Muammer Erol, şeer başı Suleyman Selmanoglu, Universitet rektorı Fırat Feyzi Bingöl, Avraasiya yazıcılar birligigniñ reisi  Yakub Deliomeroğlu, bunıñ kibi de çetelli yazıcılar ve şairler, kütleviy matbuat vastalarınıñ hadimleri bulundılar.

Merasim 19-ncı halqara  Hazar şiiriyeti hatırasına bağışlandığı Mehmet Akif Ersoy  ve Mustafa Cemilevniñ ömüri ve faaliyeti aqqında vesiqalı film numayış etildi. Cemilevniñ kendisi belli bir sebeplerden dolayı merasimde bivasta iştirak etip olamadı ve mukâfat tesisçilerine telefon vastasınen  teşekkür bildirdi.

“Ürmetli Elâzığ şeeriniñ sakinleri ve tedbir iştirakçileri! Sizlerni Qırımtatar halqı Meclisiniñ adından samimiy selâmlayım. Teessüf ki, taqdirlenüv şerefine nail oldığım mukâfatnı taqdim etüv merasimine qatılıp olamayım”, – dedi Mustafa-ağa. Özüniñ selâmlav sözünde o, qırımtatar halqınıñ sürgünligi, Vatanğa avdet oğrundaki küreşi, halqnıñ ögünde turğan problemler aqqında qısqadan aytıp, devam etti: “Allağa şükürler olsun ki, biz bu küreşimizde yañğız degilmiz. Siz kibi alicenap insanlar bar.  1976 senesi men 30 künlük açlıq tutqanımda Elâzığda maña qoltutqan insanlar numayış teşkil etkenlerini vaqıt keçtikçe bildim. Anda menim vefatım aqqında haberni aldıqlarından soñ cenaze namazları da qılınğan. Men Elâzığ sakinlerine aradan bu qadar vaqıt keçkenine baqmadan meni unutmağanları ve meni “Türk dünyasına hızmeti içün” mukâfatına taqdim etkenleri içün büyük minnetdarlığımnı bildirem”, – qayd etti M. Cemilev.

Mustafa Cemilev aqşam iştirakçileri ve musafirlerine muvafaqiyetler tiledi. Mustafa Cemilevniñ yerine mukâfatnı  Feyzi Bingölniñ elinden Avraaasiya yazıcılar birliginiñ reisi  Yaqub Deliomeroğlu aldı. Cemilevnen bir sırada bu mukâfatqa Şimaliy Qıbrız Türkiye cumhuriyetiniñ prezidenti Rauf Denktaş, qırğız yazıcısı Çingiz Aytmatov, Kazahstan prezidenti Nursultan Nazarbayev, TİKA nail oldılar. Malümat: “Türk dünyasına hızmet içün” mukâfatı  türk dünyasında itibar qazanğan devlet erbapları, alimler, sanat hadimleriniñ adını ebediyleştirmek maqsadınen 2003 senesi tesis etilgen edi.

Esma Kasar

Dilâra Tabakova

 İA “QHA”