Mustafa Cemilev: «Regionlar firqasınen saylavaldı birlik qurmaqnı tüşünmedik, çünki Ukraina ve Qırım inkişafınıñ bir çoq meselelerinde fikirlerimiz farqlı, bazıda ise qapa-qarşıdır»

16 Iyül 2012

Bu aqta Qırımtatar halqı Meclisiniñ reisi, Ukraina halq deputatı Mustafa Cemilev “Avdet” gazetasınıñ suallerine cevap berirken “Batkivşçina” firqası Qırım bölüginiñ başı A. Sençenkonıñ Meclis ve Regionlar partiyası işbirligi boyunca beyanatını izaatlağanda ayttı.

“Saylavlar boyunca, qaidemizge köre, Qırımtatar halqınıñ qurultayı qarar bere. Onda 250 delegat bar ve olar qararlarnı milliy menfaat ve olarnı saylağan semetdeşleriniñ fikirlerini esapqa alıp, qabul eteler. Şunıñ içün de, soñki yigirmi yılda Ükrianada saylavlar tecribesi şunı köstere, qırımtatarlarnıñ çoqluğı öz Qurultayınıñ qararlarına köre saylay.

Doğru, qırımtatarlar içinde temelli bir siyasiy noqtai-nazarları olmağan ufaq gruppalar olıp, olar Qurultay tevsiyelerine qarşı çıqmağa çağıralar. Olarnıñ işi öyle, şu yolnen keçineler, işte.

Regionlar firqasınen saylavaldı birlik qurmaqnı tüşünmedik, çünki Ukraina ve Qırım inkişafınıñ bir çoq meselelerinde fikirlerimiz farqlı, bazıda ise qapa-qarşıdır.

Lâkin, tahmin eteyik ki, Qurultay bütün semetdeşlerimizni Regionlar partiyasına rey bermege çağırsa, pek çoq qırımtatarları aynı böyle yapacağına iç şübe yoqtır. Çünki qırımtatarlar vekâletli organınıñ reytingi pek yüksek – Razumkov merkeziniñ malümatlarına köre 82 fayız. Andrey Sençenko Meclis itibarını qayğırğanından memnünmiz, amma raatsızlanmağa iç bir türlü esas yoqtır”, – dedi Qırımtatar halqı Meclisiniñ reisi, Ukraina halq deputatı Mustafa Cemilev