Mustafa Cemilev Pragada «Svoboda» (Azatlıq) radiosınıñ ofisini ziyaret etti

28 April 2013

Aprel 24 künü Meclis reisi Mustafa Cemilev Pragada bulunğanınıñ ilk künü”Svoboda” radiosınıñ ofisini ziyaret etip, ukrain muarririyetiniñ direktorı Mihail Mihalisko ile körüşti.

Meclis reisine bu ziyarette Meclis tışqı alâqalar bölüginiñ başı Ali Hamzin refaqatlıq yaptı. “Azatlıq” radiosı ukrain muarririyeti direktorınen körüşüv vaqtında taraflar Ukrainanıñ bugünki siyasiy vaziyetini muzakere etip, bunıñ Ukraina ve Avropa Birligi arasında añlaşma imzalanmasına mania olacağı da qayd olundı.

Qırımda Kiyevden destek alıp areketler yapqan “Mogilöv tatarları” fesatçılıq faaliyeti ukrain muarririyeti hadimlerini ğayet taacüplendirdi. Subetdeşler qayd ettiler ki, Prezident yanında aşıq-acele canlandırılğan Qırımtatar halqı vekilleriniñ keñeşi Qurultay-Meclisni yoq etmek içün qullanıla.

Meclis reisi Mustafa Cemilev radionıñ çeşit milliy muarririyetlerinen de körüşip, intervyülar berdi. Ukrain muarririyetinden Natalya Çurikova, rus hızmetinden Aleksandra Vagner, tatar-başqırt hızmetinden Alsu Kurmaliyeva, azerbaycan hızmetinden Ravşan Gambarov ve şimaliy kavkaz muarririyetinden Aslan Doukayev ondan intervyü aldılar.

Radionıñ deyerlik bütün muarririyetleri Avropa cemiyetine qatılmaq yolunda turğan Ukrainada, cümleden Qırımda qırımtatarlarğa nisbeten böyle menfiy munasebet kösterilgenini teessüf ile tilge aldılar. Jurnalistlerniñ qayd etkenine köre, bu keçmişte Yugoslaviyada olğan adiselerni hatırlata, albu ki Ukrainada bunı qatiyen yasaqlamaq zarur.

Mustafa Cemilev Qırımtatar halqı Meclisiniñ adından radio hadimlerine Qırımda qırımtatarlarnıñ vaziyetini açıqtan-açıq köstergenleri ve halqara cemaatçılıqqa doğru malümatlarnı yetkizgenleri içün teşekkür bildirdi.