Mustafa Cemilev: Menim ailemde olğan bütün şeylernen rahmetli Fevzi Edemovnıñ balalarınen paylaşmağa azırım

29 May 2013

Bağçasaray rayonınıñ Qalımtay köyünde mayıs 29 künü Fevzi Edemovnıñ cenazesine 100-den ziyade insan toplandı. Olar arasında Fevziniñ yaqınları, soy-aqrabaları, Milliy Meclis reisi Mustafa Cemilev ve ailesiniñ azaları, Meclis reisiniñ birinci muavini Refat Çubarov, reis muavini ve Fevzi Edemovnıñ aqrabası Ahtem Çiygoz, Meclis azaları, qomşu ve dostları bar edi.

Merhumnıñ anasınıñ ricasına köre Mustafa Cemilev cenazege ertece keldi. “Maña yerli imam çañ qaqıp, merhumnıñ anası menim ertece kelmemni istegenini ayttı. Çünki o, meni ailesiniñ eñ yaqın adamı, dep saya ve mevta yuvulmazdan evel Fevziniñ ruhuna dua oqumamnı rica etti”, – dedi Meclis reisi M. Cemilev.

“Biz ekimiz de oğullarımıznı ğayıp ettik, – dedi Mustafa Cemilev F. Edemovnıñ ana-babasına hıtap eterek. – Bu cenaze menim oğlum Hayserniñ qabaatınen olğanını añlayım. Menim ailem ve men içün bu büyük yanıqtır. Bizim ailemiz siziñ ağrıñıznı paylaşa, beraber kederlene. Çünki Fevzi bizim oğlumız kibi edi”.

Mustafa Cemilev ailesinde olğan bütün şeylernen rahmetli Fevzi Edemovnıñ balalarınen paylaşmağa azırlığını bildirdi.