Mustafa Cemilev kütleviy matbuat vastaları onıñ siyasiy faaliyetini bitirgeni aqqında tarqatqan haberlerge reddiye bildirdi

08 Noyabr 2011

“Men siyasiy faaliyetimni bitirgenim ya da siyasetni terk etkenim aqqında aslı da laf olmadı”, – dedi M. Cemilev jurnalistlerge noyabr 8 künü Aqmescitniñ Balaklavskaya soqağında Qurban bayramı tedbirlerinde bulunğan vaqıtta.

“Laf başqa şey aqqında kete ve bu endi iç bir kimse içün sır degil. Yani Meclis reisi saylavlarında men öz namzetini köstermeycem. 5-nci çağırılış Qırımtatar halqı qurultayınıñ delegatları menim qararıma qoltutacaqlarını işandırğan ediler”, – dep qayd etti Mustafa Cemilev.

Bunıñ kibi de Meclisniñ yetekçisi Meclisniñ yañı reisine elinden kelgeni qadar yardım bermekni vade etti. Siyasiy, uquqqoruv faaliyetini ve milliy arekette iştirakini Mustafa Cemilev devam ettirmek meramındadır. “Men qırımtatar halqınıñ menfaatlarını kelecekte de qorçalamaqnı devam etecem”, dep tasdiqladı M. Cemilev.

M.Cemilevniñ fikrince, Meclisniñ yañı saylanğan reisi Ukraina halq deputatlığına namzetini kösterse ve Qurultay delegatları buña qoltutsalar doğru olur.

“Halqımıznıñ taqdirinen bağlı siyasiy-uquqiy meselelerniñ çezimini tezleştirmek içün Qurultay köstergen halq vekilleriniñ Ukraina akimiyet organlarına keçmesi ğayet müimdir”, – dep qayd etti M. Cemilev.

“2012 senesi Ukraina Yuqarı Şurasına saylavlarda qırımtatar halqı ve onıñ vekâletli organı kimge qoltutacaq, degen sualge Meclis reisi Mustafa Cemilev qararnı faqat Qurultay delegatları alğanını daa bir kere tekrarladı.

“Bugünde-bugün Meclis Ukraina siyasiy ceryanınıñ bir çoq iştirakçilerinen körüşe, 2012 senesi saylav kampaniyasında beraber iştirak etmek tekliflerini muzakere etmekte”, dedi – utoçnil Cemilev.