Mustafa Cemilev Knut Vollebeknen körüşti

14 Oktâbr 2011

ÖBSE Milliy azlıqlarnıñ işleri boyunca Aliy komissarı Knut Vollebek Qırımnı ziyaret etip qaytqan soñ aqşam oktâbr 13 künü Kiyevde Qırımtatar halqı Meclisiniñ reisi, Ukraina halq deputatı Mustafa Cemilevnen körüşti.

ÖBSE Milliy azlıqlarnıñ işleri boyunca Aliy komissarı Knut Vollebek Qırımda – Nazirler şurası, Milliy Mecliste, bunıñ kibi de qırımtatarlarnıñ Aqmescit civarındaki “narazılıq meydanları”nda Meclis azaları Zevcet Qurtümerov, Zair Smedlâyev, Ali Hamzin, Qırımnıñ regional inkişafı ve qurucılığı naziri Sergey Brayko, Topraq, Milletlerniñ işleri boyunca cumhuriyet komitetleri azalarınen beraberlikte ötkergen körüşüvleriniñ neticelerinen paylaştı. Endi Vatanğa qaytıp kelgen ve qaytıp kelmege istegen qırımtatarlarnı topraqnen teminlev meseleleri muzakere etilgende bu sada yañı manialar hususında da laf yürütildi.

Qırımtatar halqı Meclisiniñ reisi Mustafa Cemilev ÖBSE Milliy azlıqlarnıñ işleri boyunca Aliy komissarı Knut Vollebekni Qırım ve qırımtatar halqınıñ meselelerine ayırğan diqqatı içün teşekkür bildirip, Vatslav Gavelnıñ daveti ile Pragada “Forum 2000” halqara konferentsiyada iştiraki ve ziyareti devamında körüşüvleriniñ neticeleri aqqında haber berdi.

Öz nevbetinde ÖBSE Milliy azlıqlarnıñ işleri boyunca Aliy komissarı Knut Vollebek ve yanında bulunğan yardımcıları olacaq Forumnıñ maqsadları ve vazifelerini belgilemek içün beraber çalışmağa azır olğanlarını ayttılar.

“Men eñ yaqın vaqıtta özümniñ Gaagadaki ofisime Meclis vekillerini davet etmege azırım, – dedi Knut Vollebek, Mustafı Cemilevge hıtap eterek. – Aramızdaki konstruktiv dialog mezkür tedbirni Ukrainada 2012 senesi keçirmek imkânını berir” Bundan da ğayrı Knut Vollebek Qırımtatar halqı Meclis reberleriniñ Kiyevde oktâbr 5 künü Ukrainadaki halqar teşkilâtlarnıñ vekilleri ve elçilernen körüşüvine yüksek qıymet kesti. “Menim Ukrainadaki meslekdeşlerim söyleşüvlerniñ yüksek seviyesini qayd ettiler ve körüşüvniñ deyerlik epsi iştirakçileri Forumnıñ ÖBSE imayesi altında keçmesiniñ tarafdarları olğanını bildirdiler”, – dep qoştı Knut Vollebek.

Aynı zamanda Knut Vollebek ve Mustafa Cemilev Halqara forumnı keçirüv teşebbüsine Ukrainanıñ da qoltutması müimligini qayd ettiler
Bundan da ğayrı tafsilâtlı subet devamında Mustafa Cemilev ve Knut Vollebek “Milliy mensüpligine köre sürgün etilgen şahsılarnıñ uquqlarını ğayrıdan tiklev aqqında” Ukraina qanun leyhası muzakeresiniñ vaziyetini de talil ettiler. Knut Vollebek bu qanunnıñ mıtlaqa qabul etmek zarurlığı boyunca tevsiyesini tasdiqlap, Ukrainadaki subetdeşlerini de bunıñ lâzimliginde qandıracağını işandırdı.

Mezkür körüşüvde Qırımtatar halqı Meclisi reisiniñ yardımcıları Aleksey Skorik ve Liliya Müslimova da iştirak ettiler.