Mustafa Cemilev: İnternet qırımtatarlar adına şovinistik maqale, ahlâqsız, pis çağıruv ve sözlernen toludır

10 Sentâbr 2013

2013 senesi sentâbr 10 künü Meclis reisi, Ukraina halq deputatı Mustafa Cemilev Meclis ofisinde Qırım Muhtar Cumhuriyeti ve Aqyar şeerinde Cemiyet ahlâqını qorçalav meseleleri boyunca Ukraina Milliy ekspert komissiyanıñ vekili Sergey Timoşuknı qabul etti. Körüşüvde Meclis reisiniñ muavini, Qırım Yuqarı Şurasınıñ deputatı Remzi İlyasov da iştirak etti.

Timoşuknıñ bildirgenine köre. Meclis yolbaşçılarınen körüşüv maqsadlarından biri Qırım Muhtar Cumhuriyeti ve Aqyar şeerinde Cemiyet ahlâqını qorçalav meseleleri boyunca Ukraina Milliy ekspert komissiyanıñ faaliyetinen tanış etmek, bunıñ kibi de Milliy ekspert komissiyası vazifeleri ve vekâletligi çerçivesinde işbirlik yollarını belgilemektir. Milliy ekspert komissiya Ukraina qanunlarına köre areket etken devlet ekspert ve nezaretçi bir organdır, dedi Timoşuk.

“Milliy ekspert komissiyası öz yetkileri çerçivesinde kütleviy matbuat vastaları, zorluq ve aqsımlav alâmetleri olğan temaşalarnı teşkil etken mülk saipleriniñ faaliyetini teşkermek, milletlerara davalarnı qozğağan edebiyat, oquv qullanmalarnıñ monitoringini keçirmek aqqına maliktir, -dep añlattı ekpert komissiyanıñ regional temsilcisi S. Timoşuk. – Milliy ekspert komissiyanıñ qararlarına merkeziy ve maalliy akimiyet organları, kütleviy matbuat vastaları, yuridik ve hususiy şahıslar boysunmağa borclular”.

Milliy ekspert komissiyası mıtlaqa baqması kerek problemler arasında Mustafa Cemilev misal olaraq keçenlerde cumhuriyet neşirlerinde derc olunğan maqalelerni ketirip, olarda qırımtatar halqını açıqtan-açıq aqaret etken sözlerge diqqatnı celp etti. Rusiye tarafdarı olğan sayt ve forumlarnıñ mevzuatı da Ukraina Cinaiy Kodeksi tarafından ögrenilmesi lâzim. “İnternet qırımtatarlar adına şovinistik maqale, ahlâqsız, pis çağıruv ve sözlernen toludır”, – dedi M.Cemilev.

Meclis reisiniñ muavini Remzi İlyasov ise ekspert komissiyanıñ regional temsilcisine Ukraina vatandaşlarınıñ paraları esabına çıqarılğan ve qırımtatar halqınıñ tarihını bozup köstergen em de qaralağan “Şarqiy Qırım Hatıra kitabı: hatırlamaqnı rica ettiler” kitabı aqqında malümat berdi.

“Qırımtatar cemaatçılığı kitapnıñ tirajını yaqalamaq ve davalı eser müellifi Vladimir Şirşovnı İslâm-Terek rayonınıñ fahriy sakini unvanından mahrum etmekni talap etti, – dedi İlyasov. O, bunıñ kibi de 20-nci asır cellâtı Stalinniñ cinaiy faaliyeti cumhuriyet akimiyeti vekilleri tarafından teşviq etilgenini de söyledi.

Körüşüv devamında S. Timoşuk dedi ki, Milliy ekspert komissiyasını rusiyeli aktör Aleksey Paninniñ qırımtatarlar aqqında aytqan davalı sözleri kederlendirdi ve komissiya buña mıtlaqa cevap berecek. S. Timoşuknıñ aytqanına köre, Meclis reberlerinen körüşüvden soñ “Şarqiy Qırım hatıra kitabı: hatırlamaqnı rica ettiler” kitabı ekspertizadan keçirilip, qalğan nushalarnıñ taqdiri ögrenilecek. Belli ki kitapnıñ 400 nushası İslâmterek rayon şurasında saqlana, qalğanları ise insanlarnı şaşmalatmaqnı devam eteler.

Dialog ve işbirlikni devam etmek maqsadında taraflar qırımtatar ziyalıları vekillerini de Qırım Muhtar Cumhuriyeti ve Aqyar şeerinde Cemiyet ahlâqını qorçalav meseleleri boyunca Ukraina Milliy ekspert komissiyasınıñ regional temsilciligi yanındaki cemaat eyyetine kirsetmek zarurlığını seslendirdiler.