Mustafa Cemilev deñişüv aqqında: “Daa çoq insannı azat ete bilir ediler”

03 Iyül 2024

Belki, Nariman Celâlnen beraber rus esirliginde Kremlniñ başqa reinelerini – qardaşlar Asan ve Aziz Ahtemovlar, Leniye Umerova ve qırımtatar uquq qorçalayıcısı Server Mustafaevni – de azat ete bilir ediler. Qırımtatar halqınıñ lideri Mustafa Cemilev Qırım.Aqiqatnıñ Radiosınıñ canlı yayınında bunı bildirdi.

Faqat neticesinde tek Celâl esirlikten azat etildi. O, 2019 senesinden berli Rusiyeniñ Ukrainağa deñişüv çerçivesinde azat etkeni ilk qırım siyasiy mabüsi oldı.

Mustafa Cemilev qoştı ki, Rusiye Federatsiyasınıñ yaratqanı manialarğa baqmadan, ukrain akimiyeti, vatandaşlarını rus esirliginden qaytarmaq içün çalışmağa devam ete.

“Ruslar, er vaqıt qırımtatarlarnıñ soyadlarını sile ediler, bir razılıq aqqında añlaşsa ediler, çoq şey istey ediler… bir qırımtatar adamı içün esir etilgen deyerli elli rusiye vatandaşını istey ediler”, – dep Cemilev Qırım.Aqiqatqa añlattı.

Qırımtatar halqınıñ lideriniñ sözlerine köre, Celâlnı esirlikten azat etüv meselesini çezmege tırışqanda rusiye akimiyeti bu mevzu aqqında “subetleşmege istemey, er vaqıt red ete edi”.