Mustafa Cemilev: Böyle körüşüvler Qırımda milletlerara ve dinlerara kerginlikni yımşata

21 Noyabr 2013

Ukraina halq deputatı, qırımtatar halqınıñ lideri Mustafa Cemilev Meclis yolbaşçılarınıñ diplomatik missiyalar ve Ukrainada akkreditatsiya etilgen halqara teşkilât yolbaşçıları ile eryıllıq 3-nci körüşüvini açıp, böyle dedi: “Belli ki, 2011 senesinden berli Qırımtatar halqınıñ Meclisi diplomatik missiyalar ve Ukrainada akkreditatsiya etilgen halqara teşkilât yolbaşçıları ile körüşüvler keçirmesinden esas maqsad olarnı qırımtatarlarnıñ milliy meselesi çeziminiñ ketişatı ve sovetler rejimi devrinde sürgün etilgen qırımtatar halqı ve diger halqlarnıñ aqlarını tiklevniñ vaziyeti aqqında haberdar etmektir”.

Bunıñ kibi de o, qayd etti ki: “Böyle körüşüvler pek müim, çünki olar qırımtatar halqınıñ problemini halqara seviyege çıqara ve bu problemniñ çezimine siltem ola”.

“Eñ müimi – olar Qırım yarımadasında milletlerara ve dinlerara kerginlikni yımşata. Buña biz büyük emiyet beremiz” , – dedi Cemilev. Mustafa Cemilev “evelki, 2011 ve 2012 senelerde olğan eki körüşüvimizniñ neticelerinen pek memnünim, çünki olarnıñ esas neticesi OSCE ve Avropa Birligi imayesinde Qırımtatar halqı ve diger sürgün etilgen milletlerniñ meselesi boyunca halqara forum keçirilmesi boyunca qarar alğanıdır”.

Bunıñ kibi de, Mustafa Cemilev OSCE Milletlerniñ işleri boyunca Aliy komissariat ve şahsen Knut Vollebekni qırımtatar halqı problemleriniñ bütün ceetlerini ögrenüv boyunca ekspert gruppasını ve şu problemlerniñ çezimi boyunca yol haritasını tizgeni içün teşekkür bildirdi. “Ümüt etemiz ki, halqara gruppa tarafından yapılğan tedqiqatlar Avropa Birligi Aliy komissarı Ştefan Füleniñ tevsiyesi boyunca qırımtatar halqı sürgünliginiñ 70 yıllığı arfesinde yani kelecek seneniñ mayıs ayına qadar keçirmek kerek olacaq Halqara forumğa temel qoyar”, – dedi Cemilev.

“Körüşüvimizniñ nevbetteki müim vazifesi keçken devirdeki işlerniñ ketişatı aqqınlda malümat bermek ve bunıñ kibi de Milliy Meclisniñ yañı erkânını taqdim etmektir. Bilmegenler içün bildirem ki, üç afta evelsi olıp keçken milliy qurultayımızda Meclisniñ yañı erkânı saylandı. Meclisniñ yañı reisi olaraq cenap Çubarov seçildi”

Hatırlatamız ki, 2013 senesi noyabr 21 künü Kiyevde Meclis yolbaşçılarınıñ diplomatik missiyalar ve Ukrainada akkreditatsiya etilgen halqara teşkilât yolbaşçıları ile eryıllıq 3-nci körüşüvi olıp keçti.

Körüşüvde çet devlet elçilikleri, BMT, Avropa Birligi kibi halqara teşkilâtlar, Migratsiya boyunca halqara teşkilâtnıñ Ukrainadaki temsilciligi, BMT aliy komissarı idaresiniñ Beyazrusiye, Moldova ve Ukraina boyunca temsilciliginiñ 30-dan ziyade vekilleri,

Körüşüvniñ resmiy teşkilâtçısı “Qırım inkişafı fondı” hayriye teşkilâtı, ortağı ise “Qırım Halqara Biznes Birleşmesi” oldılar.