Mustafa Cemilev: «Biz akimiyet doğru, dep tanığan şeyni degil, kendimiz doğru tanığan şeyni söylemege alıştıq»

28 December 2012

“Perekröstok” programmasınıñ alıp barıcısı Nariman Celâl Meclis reisine Qırımtatar halqınıñ keyfi, Meclis faaliyeti hususındaki fikirleri aqqında böyle sual berdi: “2012 senesi devamında qırımtatarlar arasında öyleleri de tapıldı ki, angileri “ne içün biz muhalifetke qoltutamız, keliñiz biz akimiyet partiyasına qoltutayıq ki, meselelerimiz tezce çezilsin. Bu fikirge cemaat teşkilâtları ve atta Qurultaynıñ bazı bir delegatları qoşulalar. Keçenlerde programmamıznıñ musafiri olğan Qırım Yuqarı Şurasında “Qurultay-Ruh fraktsiyasından deputat Enver Abduraimov ne sebepten Meclis akimiyet partiyasınen sıqı alâqada bulunmağa istemegenini añlamayım, dedi”.

Meclis reisi Mustafa Cemilev dedi ki, böyle beyanatlarğa o, siyasiy konformizm dep qıymet kese. Halq arasında buña daa da keskin fiyat keseler.
“Bu ne – akimiyet nasıl olsa-olsun, biz onı medh etip, peşindenmi ketecekmiz ve bizge de bir şeyler tüşer, dep bekleycekmizmi? – dedi Meclis başqanı. Yaş siyasetçi Enver Abduraimov ğaliba Qırımtatar milliy areketiniñ asılını añlamay. Biz daima belli bir temelli printsiplerge esaslanaraq, milliy demokratik areketlerge qoltuttıq”.