Mustafa Cemilev Birleşken muhalifet «Batkіvşçina» Bütünukrain birleşmesiniñ bir cedvelinde 12-nci sırada

30 Iyül 2012

2012 senesi iyül 30 künü Kiyevde, Turovskaya soqağındaki 13-nci evde, “Batkivşçina”nıñ ştabı bulunğan yerde açıq avada Birleşken muhalifet “Batkіvşçina” Bütünukrain birleşmesiniñ qurultayı olıp keçti.

Qurultay neticelerine köre Birleşken muhalifet “Batkіvşçina” Bütünukrain birleşmesinden Ukraina Yuqarı Şurasına saylavlarda bir mandatlı saylav dairelerinde deputatlıqqa namzetler ve çoqmandatlı saylav dairelerde deputatlıkqa kösterilgen namzetlerniñ cedveli tasdiqlandı.

Eki cedvel de, er bir namzet kibi qurultay delegatları tarafından muzakere olunğan soñ tasdiqlandılar.

Qırımtatar halqı Meclisiniñ reisi, Ukraina halq deputatı Mustafa Cemilev Birleşken muhalifet “Batkіvşçina” Bütünukrain birleşmesiniñ bir cedvelinde 12-nci sırada yer aldı. Cedvelniñ birinci sıralarına Yuliya Timoşenko, Arseniy Yatsenük, Anatoliy Gritsenko, Aleksandr Turçinov ve Yuriy Lutsenko namzetleri kirsetildi.

Bütün meseleler baqılğan soñ Ukraina gimni yañğıradı, soñra qurultay delegatlarınıñ episi Ukraina Yuqarı Şurasınıñ nevbetten tış toplaşuvına keçtiler.
Şunı hatırlatamız ki, 2012 senesi iyül 27-de Qırımtatar halqınıñ Meclisi ve Birleşken muhalifet “Batkіvşçina” Bütünukrain birleşmesi saylavlarda işbirlik boyunca ortaqlıq beyanatını imzaladılar.

Birleşken muhalifetke 7 partiya kire – “Batkіvşçina” Bütünukrain birleşmesi, “Front zmіn” (Deñişmeler cebesi), “Narodnıy ruh Ukrainı” (Ukraina halq areketi), “Grajdanskaya pozitsiya” (Vatandaşlıq pozitsiyası) , “Za Ukrainu” (Ukraina içün!), “Reformı i porâdok” (İslâat ve tertip-nizam), “Narodnaya Samooborona” (Halq mudafaası).

Ukraina Yuqarı Şurasına saylavlar 2012 senesi oktâbr 28-de olacaq.