Mustafa Cemilev AQŞ mustaqilligi künü munasebetinen keçirilgen tantanalı qabulda iştirak etti

04 Iyül 2012

AQŞnıñ Ukrainadaki Vefqulade ve Tolu vekâletli elçisi Con Tefftniñ daveti ile Qırımtatar halqı Meclisiniñ reisi, Ukraina halq deputatı Mustafa Cemilev iyül 4-te AQŞ mustaqilligi künü munasebetinen keçirilgen resmiy qabulda iştirak etti.

Tedbir AQŞnıñ Ukrainadaki elçisiniñ qonağında keçirilip, fahriy musafirler arasında Ukrainada akkreditatsiya etilgen diplomatik missiyalar ve halqara teşkilâtlarnıñ vekilleri, siyasetçiler ve Ukraina cemaat erbapları taqdim etildiler.

Malümat içün: Mustaqillik künü (Independence Day) Amerika Qoşma Ştatlarınıñ serbest ve mustaqil devlet sıfatında doğğan künü sayıla. Bir çoq amerikalılar oña sadece Fourth of July – iyül 4, deyler. .

1776 yılınıñ iyül 4-nde Kongress Mustaqillik deklaratsiyasını maqulledi. 13 ştat vekilleri Filadelfiya şeer memuriyetiniñ binasında Qoşma Ştatlarnı serbest ve Britaniya qırallığına bağlı olmağan mustaqil devlet, dep ilân
etken vesiqanı imzaladılar.

Deklaratsiya yañı devletleniñ sadece “Doğğanı aqqında şeadetname” olıp qalmadan Amerika edebiyatınıñ da abidesi oldı. Bayram açıq avada şeñ tedbirler, kontsert ve vatanperverlik nutqları ile keçirile.