Mustafa Cemilev: Akimiyet Mecliske yaqın insanlarnı çetleştirip, «Mogilövnıñ tatarlarını» işke ala

20 February 2013

2013 senesi fevral 20 künü Qırım Yuqarı Şurası altıncı sessiyasınıñ toplaşuvında Qırım Yuqarı Şurası Milletlerara munasebetler ve sürgün etilgen grajdanlarnıñ işleri boyunca daimiy komissiyanıñ reisi Remzi İlyasovnı vazifesinden boşatıp, bu vazifege Enver Abduraimovnı tayinlev meselesi baqıldı.

Rey berilmezden evel Yuqarı Şurada “Qurultay-Ruh” fraktsiyasınıñ başı Refat Çubarov mezkür meseleniñ kün tertibine qoyulmasına ve umumen tayinlevge qarşı çıqtı. Onıñ aytqanına köre Remzi İlyasovnıñ yerine tayinlengen deputat fraktsiya erkânından çıqarılacaq.

Bundan da ğayrı Çubarov Abduraimovnıñ tayinlenmesine dair qararlardan onıñ “Qurultay-Ruh” fraktsiyasından kösterildi, degen cümleni alıp taşlamaqnı talap etti.

“Biz Enver Abduraimovnıñ namzetini köstermedik. Siz bizim fraktsiyamıznı çetlep keçtiñiz ve onı öz qararıñıznen kösterdiñiz. Demek, “konsultatsiyalar keçirildi” degen ibareni alıp taşlañız. İç bir türlü konsultatsiya olmadı. Böyle yalannı bu binanıñ içinde yoq eteyik”, – dedi Çubarov parlament minberinden.

Qırım parlamentiniñ azaları Refat Çubarovnıñ talaplarını esapqa almadılar ve o teklif etken deñişmeler içün rey bermediler. “Qurultay-Ruh” fraktsiyasınıñ talaplarını köz ögüne almaq talabınen fraktsiya azası Safure Kacametova da çıqışta bulunıp, fraktsiyada Enfer Abduraimovdan ğayrı deputatlar da olğanını ayttı.

“Enver Abduraimov ille bu vazifege oturğan soñ bu qadar öz halqına yardım etmege istegeninden haberim yoq edi. O, iç bir zaman bu saada çalışmadı, onı degil de, başqasını tayinleñiz”, – dedi Kacametova.

Öz nevbetinde Qırım Yuqarı Şurasınıñ deputatı Enver Abduraimov minberge köterilirken, “bu mesülietlik yüküni” boynuna almağa azır olğanını söylep, Remzi İlyasov komissiya reisi olaraq öz vazifesini yahşı becermegenini qayd etti. Abduraimov Remzi İlyasov daimiy komissiya reisi vazifesini eda etip olamağanını professional delillerge esaslandırıp olamadı. Faqat dedi ki, kendisi Yuqarı Şurağa siyasetnen oğraşmaq içün kelmegen. “Bugünde-bugün men Nazirler Şurası, akimiyet partiyası ve Qırımda sürgünlilerniñ meselesi oğrunda areket etken bütün qurumlarnen çalışmağa azırım”, – dedi Abduraimov.

Neticede Remzi İlyasovnıñ vazifesinden boşatılması içün 79 deputattan 66-sı rey berdi. Bundan soñ deputatlar Komissiya reisi olaraq Enver Abduraimovnı tayinlediler. Bu qararğa 80 deputattan 68-i qoltuttı.

Rey berilgen soñ “Qurultay-Ruh” fraktsiyasınıñ başı Refat Çubarov şu daqqadan itibaren Abduraimov fraktsiya erkânından çıqarılğanını ilân etti.

Kiyevde Ukraina Yuqarı Şurasınıñ sessiyasında bulunğan Meclis reisi, Ukraina halq deputatı Mustafa Cemilev bu vaqiağa izaat berirken, ükümet akimiyet qurumlarında öyle de az sayıda olğan Mecliske yaqın insanlarnı çetleştirip, akimiyet organlarına “Mrgilövnıñ tatarlarını” işke ala, dedi.

Meclisniñ reisi şunı da tasdiqladı ki, yaqın vaqıtta Qırımda Qırımtatar halqınıñ nevbetten tış sessiyası olıp, onda Ukraina ve Qırımdaki siyasiy vaziyet boyunca qırımtatar halqınıñ noqtai-nazarı bildirilecek.