Mustafa Cemile Avropa Birligi delegatsiyası ile körüşti

16 Iyün 2013

2013 senesi iyün 15 künü Milliy Meclis reisi Mustafa Cemilev Avropa Birligi delegatsiyası ile körüşti. Avropa Birliginiñ Qomşulıq programması çerçivesinde Avropa ve Cenübiy Kavkaz devletlerinen işbirlikniñ coğrafiy koordinatsiyası meseleleri boyunca bölük başı Andrea Matteo Fontana reisligindeki delegatsiyasına bunıñ kibi de Ukraina içün Avropa komissiyası inkişaf ve işbirlik meseleleri boyunca baş direktoratnıñ coğrafiy koordinatorı Marka Tilla, Avropa Birliginiñ Ukrainadaki temsilciligiñ tışqı yardım programmalarınıñ idarecisi Endrü Razbaş ve Avropa Birliginiñ Qırım ve Aqyar boyunca birleşken teşebbüsler koordinatorı Entso Damiano kirdiler.

Milliy Meclisni körüşüvde Milliy Meclis reisiniñ birinci muavini Refat Çubarov, tışqı alâqalar bölüginiñ başı Ali Hamzin, Meclis Prezidiumınıñ azası, Bağçasaray rayon devlet memuriyetiniñ başı İlmiy Ümerov ve Kiyevdeki qırımtatar cemiyetiniñ reisi Aslan Ömer Kırımlı temsil ettiler.

Musafirlerniñ ricasına köre Refat Çubarov Rusiye Qırım hanlığını 1783 senesi işğal etmezden evel öz devleti olğan, 1944 senesi sürgünlikke oğratılğan, Vatanğa qaytuv oğrunda küreşken qırımtatar halqınıñ tarihı ve bugünki vaziyetini tarif etti.

“80-nci senelerniñ soñunda kütleviy narazılıq aktsiyaları dünya cemaatçılığı içün signal oldı ve o, qırımtatar meselesi aqqında aytıp başladı. Biz bütün ve sistem olmaq maqsadında Qırımğa qaytqan soñ milliy idare organımız Qurultay-Mecliske tayanamız”, – dep qayd etti R. Çubarov.

Qırımdaki içtimaiy-siyasiy vaziyetni ve qırımtatar halqınıñ bugünki alı muzakere etilgende Meclis yolbaşçıları Avropa Birligi delegatsiyasınıñ diqqatını Qırımtatar halqınıñ aqlarını tiklev, Ukrainada onıñ inkişafını teminlev meselesi boyunca halqara forumğa azırlıq meselelerine celp etti. “Halqara cemaatçılıqnıñ tesiri ve iştiraki olmadan Ukrainada er angi bir siyasiy küçniñ qoltutuvına irişmek küç, – dedi Meclis reisi Mustafa Cemilev ve Ukrainada stabillik milliy mensüpligine köre sürgün etilgen qırımtatarlarnıñ meselesi ne derecede çezilgenine bağlıdır, dep qoştı.

Meclis reisiniñ aytqanına köre bir sıra yetekçi Avropa devletleri, Kanada, Amerika, Türkiye siyasetçileri, halqara teşkilâtlarnıñ vekillerinen körüşüv ve añlaşmalar olğanına baqmadan Ukraina Meclisniñ bu teşebbüsini körmemezlikke ala ve Halqara forum keçirilmesiniñ zarurlığını añlamağa istemey.

Meclis tışqı alâqalar bölüginiñ başı Ali Hamzin öz nevbetinde böyle bir meraqlı faktnı qayd etti – Ukraina akimleri Qırımğa qaytmaqta olğan qırımtatarlarnı qaytaruv ve yerleştirüv işinde yardım sorap Türkiyede Ukraina Elçiligi vastasınen qırımtatar derneklerine muracaat etken bir vaqıtta aynı şu meselelerni çezmek maqsadınen keçirilmesi planlaştırılğan Halqara forumğa nisbeten resmiy Kiyev añlaşılmağan bir pozitsiyanı alıp, forum ötkerilmesine razılığını alâ daa bermedi.

Eki saat devam etken dialog neticelerine yekün çekken Endrü Razbaş Halqara forum keçirilmesinde mevcut zorluqlarnı çezmek içün bu aqta Avropa Birligi akimiyeti institutları, şu cümleden Avropa Birliginiñ Ukrainadaki temsilciligine bildirmege azırlığını tekrar tasdiqladı.