Mülkiyetniñ aydutlı alıp çıqarıluvı — Meclisniñ reisi, işğal etilgen Qırımdaki mülkiyetniñ “milliyleştirilüvi” aqqında söz ayttı

03 Noyabr 2024

Qırımtatar Milliy Meclisiniñ reisi, hususan Suspilne Qırım içün işğalcilerniñ Qırımdaki Ukraina vatandaşlarınıñ mülkiyetiniñ “milliyleştirilüvi”niñ neticeleri aqqında beyanatlarını izaatladı. Yarımadanıñ Rusiye kontrolindeki akimiyeti, soñki eki sene içinde ukrainlerniñ mülkiyetini 4,5 milliard rublege satqanını iddia ete.

Suspilne Qırım bunı yazdı.

“Vaqtınca işğal etilgen Qırımda vatandaşlar ve uquqiy şahıslarnıñ mal-mülkiniñ milliyleştirüvi dep adlandırılğan şey, yarımadanı terk etken ve Rusiyege Qırımnı işğal etmek ıntıluvlarına er türlü şekilde qarşılıq köstergen Ukraina işhaneleri ve vatandaşlarınıñ mülküni aydutlı şekilde tutıp aluv usullarından başqa bir şey degil”, — dep Meclisniñ reisi Refat Çubarov bildirdi.

Refat Çubarovnıñ bildirgenine köre, böyleliknen Qırımda işğalciler yarımadada mülkiyeti olğan çetel şirketlerniñ mülküni hırsızlaylar.

“Eger olarnıñ saipleri işğalci memleketniñ qanunlarına köre mülkiyetni ğayrıdan resmiyleştirmege istemeseler, olar qanunsız sürette çıqarılır”, — dep Refat Çubarov qoştı.

Keçken sene qırımtatar halqınıñ temsiliy-icra organı olğan Meclisniñ binası da aynı şekilde işğalciler tarafından keçken sene “milliyleştirildi” ve muzıka mektebine berildi.

Meclisniñ reisi hatırlattı ki, Rusiye işğalcileriniñ Qırımdaki areketleri qanunsız ve uquqiy ceetten yaramay, hırsızlanğan mülkiyet ise eminliknen saiplerine qaytarılacaq.

“Qırım azat etilecek ve Ukrainanıñ yarımada üzerinde suvereniteti ğayrıdan tiklenecek soñ bütün “milliyleştirilgen” mülk qanuniy saiplerine qaytarılacaq”, — dep Çubarov bildirdi.

Hatırlatamız ki, keçkenlerde Qırımnıñ işğalli yolbaşçısı Sergey Aksönov, 2022-2024 seneleri Rusiye akimiyeti ukrain şirketleri ve vatandaşlarına ait 3,5 biñ obyektni “milliyleştirdi”, dep bildirdi.

Bundan ğayrı, 2023 senesi mayıs ayında Qırımnıñ işğalli mebusları yarımadada ukrain saipleriniñ obyektleriniñ “milliyleştirilüvi” içün rey berdiler. İşğal etilgen Aqmescitteki Şmidt soqağındaki Qırımtatar Milliy Meclisiniñ binası, em de Yaltadaki Olena Zelenskanıñ dairesi, Aluştadaki balalar lageri, Aqmescitteki ticariy binalar ve ukrain bankları, sanayı müessiseleriniñ mülkiyeti 58 obyektten ibaret cedvelge kirdi.