Muhalifet lideri Yuliya Timoşenko: Biz qırımtatar halqınıñ Stalin totalitar rejimi tarafından bozulğan öz Vatanında yaşamaq aqqını ğayrıdan tiklemek kerekmiz

26 Oktâbr 2013

Oktâbr 26 künü Qırımtatar halqı VI çağırılışı Qurultayınıñ 1-nci oturımı başlandı

Bütünukrain “Batkivşçina” birleşmesiniñ lideri Yuliya Timoşenko adından Qırımtatar halqı VI çağırılışı Qurultayınıñ delegatlarına hayırlavnı Ukraina halq deputatı, Ukraina Yuqarı Şurası Avropa qatıluvı meseleleri boyunca komitet bölüginiñ reisi, “Batkivşçina” fraktsiyası reisiniñ muavini Böris Tarasük oqup eşittirdi.

“Qıymetli dostlar! Yeñilmez qırımtatar halqınıñ sayğılı vekilleri!

Bugün qırımtatar halqı aliy vekâletli organı milliy qurultayğa toplanğan delegatlarını samimiy hayırlayım. Bugün sizlernen beraber olmaq imkânından mahrum olaraq göñlümnen sizler ile olğanımnı ve sizlerniñ adaletli işiñizge qoltutqanımnı bildirmek isteyim.

Men şimdi azatlıqta olmasam da, biliñiz ki bugünki mürekkep, munafıqlar camilerni yaqqanda ve degerlikleriñizni aqaret etkende, ecdatlarıñıznıñ qanı tökülgen topraqqa fesatçılar milletlerara nefret urluqlarını saçqan kergin künlerde sizlernen beraberim. Men siziñ ağrıñıznı paylaşam ve ğadabıñıznı añlayım.

Qırım bu cümert ve muqaddes bir topraqtır, Avropa içün milletlerara ve dinlerara uyğunlıq örnegi olmaq kerek. Ukrain cemiyeti insanlar arasında qavğalarnı toqtatması zarur. Vatandaşlıq añını yükseltmek, devlet siyasiy sistemni demokratlaştırmaq iyayun çoq iş yapmamız kerek.

Biz qırımtatar halqınıñ Stalinniñ totalitar rejimi tarafından bozulğan öz Vatanında yaşamaq aqqını ğayrıdan tiklemek kerekmiz. Mında aynecilikke yer berilmemek kerek. Bu menim açıqtan-açıq pozitsiyam. Ve daima böyle olacaq, bizim beraber küreş alıp barmaq ve zaferlerge irişmek saasında tecribemiz bar. Eminim ki, eñ büyük yeñişimiz daa ögde.

Qıymetli qırımtatarlarım! Biz beraber ukrain halqımız. Ve eger de halqımız arasında kimdir qorçalanmağan olsa, aqları aqsımlansa, eziyet çekse epimizge yaramay ola. Kelecegimizni beraber quramız. Küçlerimizni birleştirip tuvğan Ukrainamıznı köterirmiz, beraber Avropa serbest halqlar ailesine qoşulırmız. Taliy bizge külüp baqar!

Qırımtatar halqına şan-şerefler!

Ukrainağa şan-şerefler!
 

Siziñ  Yuliya Timoşenkoñız

g.Harkov. Kaçanov apshanesi
25 oktâb 2013 senesi Böris Tarasük Yuliya Timoşenkonıñ hayırlavını oquğan soñ Qurultay Prezidiumınıñ azası Refat Çubarov Qurultay delegatları adından “Batkivşçina” reisi Yuliya Timoşenkoğa samimiy sözleri içün teşekkür bildirdi. “Qırımtatar halqı Qurultayı delegatları adına bildirgen samimiy ve ümüt berici sözleriñiz içün sağ oluñız. Ümüt etem ki, bütün delegatlar da buña qoşulırlar, – dedi Refat Çubarov. – Avropa halqları ailesinde biz kerçekten de beraberlikte bizge mürekkep körüngen bütün meselelerni çezebilirmiz. Biz öz toprağımızdamız ve biz mustaqil Ukraina devleti terkibinde belgilenirmiz. Biz daima beraber olurmız ve iç kimse buña keder etip olamaz”.