Milliy sınıf odasınıñ taqdimi

02 October 2012

Aqmescit (Simferopol)  rayonınıñ Acı-Qal (Çitenkoye) köy umumtasil mektebindeki  2-ci milliy sınıfta  quvançlı vaqia yüz berdi.  Talebeler yaqında rekonstruktsiya etilgen sınıf   odasına   köçtiler. Sınıfnıñ tamirini ve  tolu   donatmasını   teşkilâtlandırılğan QYUŞnıñ deputatı,   Milliy Meclis medeniyet ve tasil idaresiniñ müdiri, “Maarifçi” birleş-mesiniñ reisi Safure Kacametova oca ve taleberni özü  ve sponsorlar  adından hayırlap,  milliy sınıf odasını  taqdim etti. 

Safure hanım bildirgenine köre,  keçken senesi  iş bu  rus tilinde  talim  bergen mektepte  1-ci qırımtatarca oqutqan sınıf  zar-zornen açılğan  edi. Sınıf odası olmağanı  içün altı yaşındaki sabiyler  2-ci  qatta yerleşken fen  kabinetinde oqudılar ve boyuna  kelişmegen  büyük  masa- ralede  oturdılar. Sınıf  odasınıñ  kerekli  şaraiti olmağanı sebebinden oquv yılınıñ soñuna sınıfta  8 talebeden  5 bala qaldı.  Vaziyetni  doğrultmaq içün   S. Kacametova    bir yıl sponsor aradı   ve niayet,  oquv yılı bitken soñ –  yaz  tatiliniñ soñunda  Reskom-natsnıñ  yardımı ile boş turğan  stomatologiya odası  tamir etildi ve  milliy sınıf öz odasına nail oldı. 

Türkiye cumhuriyeti  Qoca-Eli Qırımtatar Federatsiyasınıñ başı VEFA-İBRAİM ARACİniñ  ise maddiy  desteginen  sınıfqa  tolu mektep eşyaları:  masa- raleler,  ocanıñ iş köşesi,  kitap  şkafı,  üç qanatlı magnit   divar sınıf tahtası alındı. Bu  areketlerni körgen   ana -babalar  yañı oquv yılınıñ başında balalarını   rus sınıfından qırımtatar sınıfına  keçirdiler ve talebelerniñ sayısı 12 köterildi.   Bu sene ise, kenede maarifçilerniñ küçünen – mektepte  ana tilini  teren şekilde  ögrengen  daa bir  sınıf açıldı  ve  bu sınıfta 31  qırımtatar balası oquy.

Aqmescit rayonınıñ Acı – Qal (Çistenkoye) köy umumtasil mekktebinde al azırda 787 talebe oquy. Olarnıñ 384 milletimizniñ evlâtları. Mektep müdiri Lübima Kotolupova bildirgenine köre,  qırımtatar tilini fen olaraq balalar-ımıznıñ tek 178 ögrene. Keçken sene mektebimizde 1ncı milliy sınıf açıldı dey müdire.  Bu tecribeni devam etmek içün yañı çareler kerek oldı ve sınıf odalarımız yetişmegenini yerli meclis, “Maarifçi” birleşmesine ve şahsen Qırım Parlamentiniñ deputatı Safure Kacametovağa bildirgenimiznen  iş  çezilip  başlandı,   dep qayd ete  Lübima Kotolupova.

Mektepte müdir muavini vazifesini eda etken Roza  Misitskaya mektep talebe-lerimizniñ 56% zı qırımtatarları amma yıl- yıldan ana- babalarğa balaları  ana tilini fen olaraq ögrenecegi   aqqında  arizanı yazdırmağa küç ola, dey.

Bu sene qırımtatar tilini teren  şekilde ögretecek  1-ci  sınıfqa talebelerni tek sınıf  rekonstruktsiyası başlanğan soñ toplay başladıq, dey Roza oca.

Oqutuv eki smenada keçken mektepte milliy sınıflarnı çoqlaştırmaq niyetinde olğan deputat Safure Kacametova der al yardımğa  kele ve  hayırsever insanlarnı  bu işke celp  etkeni  mektepke  faydalı  oldı. 

Mektepte keçirilgen milliy  sınıf  odasınıñ taqdimnamesi ana-baba, yerli cemaatçılıq ve mektep memuriyetine işanç besledi. Açılğanda – 8, oquv yılnıñ soñunda – 5,  şimdi ise –12 talebeden ibaret olğan 2-ci milliy sınıfnıñ ocası Elzara Nimetullayeva ve talebelerniñ teşekkürleri soñsız edi.   S.Kacametova olarnıñ  quvanç  alğışlarını  mıtlaqa sponsorlarğa yetkizerim dep, işandırdı.