Milliy Meclisniñ yañı reisi olaraq Refat Çubarov saylandı

27 Oktâbr 2013

Qırımtatar halqı Meclisiniñ reisini saylav boyunca Qurultay esap komissiyasınıñ başı Lemmar Yunusov gizli rey berüv neticelerini sevslendirdi. Esap komissiyasınıñ malümatlarına köre 248 bülleten azırlanıp, 242-si tarqatıldı, 6 bülleten qapatıldı. “242 bülleten açılğan soñ 2 bülleten kerçek degil, dep sayıldı”, – dep ilân etti L. Yunusov.

Remzi İlyasovnıñ namzeti içün Qurultaynıñ 114 delegatı rey berdi, Refat Çubarovnıñ namzetine ise 126 delegat qoltuttı. Böyleliknen, Milliy Meclisniñ yañı reisi olaraq Refat Çubarov saylandı.

Öz nevbetinde Remzi İlyasov Refat Çubarovnı ğalebe ile hayırlap, oña Meclis reisi vazifesinde muvafaqiyetli ve mahsuldar çalışmalar tiledi. Bundan soñ Remzi İlyasov ve Refat Çubarov el tutuştılar.

1991 senesinden berli Mecliske reislik yapqan Mustafa Cemilev jurnalistlerge izaat berirken, Meclis reisi olaraq Refat Çubarov seçilgeninden memnün olğanını söyledi ve eger de Remzi İlyasov saylanğan olsa da memnün olacağını ilâve etti.

Mustafa Cemilev ileride bu eki siyasetçi beraberlikte çalışacaqlarına ümüt bildirdi. “Qırımtatar halqınıñ ömürinde tarihiy vaqia yüz berdi — 22 yıl degende Meclis reisi deñişti ve bizim vazifemiz yañı reberlerge, yañı saylanğan reiske yardım bermektir, – dedi M. Cemilev. – Meclis başqanlığı işançlı ellerge keçkeninden memnünim”.

Kelecekke planlarınen paylaşqan Mustafa Cemilev “Halqqa hızmet etmek içün Meclis reisi olmaq şart degil. Yapılacaq iş pek çoq. Ekinci meseleni men öz çıqışımda seslendirdim. Men qırımtatar halqı idare sistemasını yani Meclis-Qurultay milliy organ qurumını pekitüvni özümniñ vazifem, dep bilem”.

Qırımtatar halqınıñ dünyaca tanılğan lideri Mustafa Cemilev şunı da qayd etti ki, eger de Meclisniñ yañı reis yolbaşçılığındaki erkânı çalışıp olamasa, eñ qısqa müddet içinde Qurultaynıñ yañı oturımı çağırılıp, yañı reisi ve yañı erkânı saylanabilir. “Men bu aqta tenbiledim, eger de Qurultay yolbaşçılar meselesini muzakere etmek içün yañı oturım çağırmaq zoruna qalsa, bu insanlarnıñ siyasetçi olaraq istiqbali yoqtır, – dedi M. Cemilev. – Şunıñ içün de men olarğa Qurultay delegatlarına nisbeten ve zenaatdaşlarınen munasebetlerinde muqaytlıqnen laqırdı etmelerini tevsiye ettim”.

VI çağırılış Qurultay delegatları 33 kişiden ibaret Qırımtatar halqı Meclisi azalarını, şu cümleden Meclis reisi, bunıñ kibi de Qurultay Teftiş komissiyası azalarını saylamağa kiriştiler.