Milliy Meclisniñ nevbetteki toplaşuvı

26 July 2013

2013 senesi iyül 26 künü Milliy Meclisniñ kenişletilgen toplaşuvı olıp keçti.

Onıñ kün tertibine eki mesele qoyuldı: Qırımtatar halqı Meclisi U1 çağırılış Qurultayı birinci oturımınıñ keçirilmesi aqqında, avgust 23 künü stalinizm ve natsizm qurbanlarınıñ hatırası umumavropa künü Bütünqırım informatsion piketini teşkilâtlandıruv aqqında.

Birinci mesele boyunca çıqışta bulunğan Meclis Kâtibiyetiniñ başı Zair Smedlâyev Meclis azalarına Qırımtatar halqı Meclisi U1 çağırılış Qurultayı birinci oturımını azırlav boyunca teşkiliy hızmet erkânına dair pritsipial tekliflerni seslendirdi. Teklif olunğan leyhanıñ muzakeresinden soñ Mecli azaları çoqluq reylernen qarar qabul ettiler. Mezkür qararğa binaen teşkiliy hızmetke reis olaraq Milliy Meclis reisi Mustafa Cemilev, muavini – Meclis Kâtibiyetiniñ başı Zair Smedlâyev, kâtibi – Qurultay Merkeziy saylav komissiyasınıñ kâtibi Alim Zeytullayev saylandılar.

Teşkiliy hızmet terkibine Qurultayğa 4 fayızlı manianı keçip olğan qırımtatar cemaat teşkilâtlarından birer vekil ve 10-dan ziyade adam saylanğan regionlarnıñ vekilleri kirsetildi.

Böyleliknen, Qurultay oturımını azırlav boyunca teşkiliy hızmet 18 adamdan ibaret olacaq.
Qurultaynı keçirüv künü Meclisniñ nevbetteki toplaşuvında belgilenecek.

Ekinci mesele boyunca sözge çıqqan Milliy Meclis reisiniñ birinci muavini Refat Çubarov şunı haber etti ki, 2009 yılından başlap Milliy Meclis er sene avgust 23 künü Umumavropa stalinizm ve natsizm qurbanlarınıñ hatıra kününe bağışlap ukrain milliy-demokratik küçler ile birlikte sürgünlik ve qatl qurbanlarınıñ hatırasını saqlamaq maqsadında infoormatsion piketlerni keçire.

Bu yılı da böyle tedbirni keçirmek içün Bütünqırım aktsiyasını azırlav ke keçirüv boyunca teşkiliy komitetni meydanğa ketirmek qararı alındı.

Teşkiliy komitetke Milliy Meclis reisiniñ birinci muavini Refat Çubarov yetekçilik, Dilâver Akiyev ise kâtiplik yapacaqlar.

Regional meclis reislerine aktsiya keçirilmesinde semetdeşlerniñ iştirakini teminlemek avale etildi.