Milliy Meclis yolbaşçıları ve azalarınıñ cemaat teşkilâtları vekillerinen, vatandaşlarımıznen körüşüvi olacaq

06 Mart 2011

Belli olğanı kibi, Milliy Meclis ve öz-özüni idare etken digger milliy qurumlarınıñ esas iş usullarından biri – vatandaşlarımıznen muntazam sürette körüşmek.

Milliy Meclisniñ yolbaşçıları ve azaları vatandaşlarımız yaşağan yerlerinde ötkerilgen ve olarnıñ devamında cemaat meseleleri açıq qoyulğan toplaşuvlarda daima iştirak etip kelmekteler.

Misal içün bu seneniñ başından, yani üç ay içinde Milliy Meclis yolbaşçıları ve azaları, Milliy Qurultay Teftiş komissiyasınıñ azaları Aluşta, Qarasuvbazar, Canköy, Mayak-Salın, Aq-Şeyh, Aqmescit, Suvdağ, Aqmeçit regionlarında ve Herson vilâyetindeki onlarnen köy-qasabalarında oldılar.
Qırımnıñ çeşit köşelerinde ve onıñ tışında olıp keçken toplaşuvlarda, yerli meclislerdeki körüşüvler ve seminarlarda, ocalarnen olğan muşaverelerde biñlernen vatandaşlarımız iştirak etti.

Milliy Meclis azalarınen beraberlikte böyle tedbirlerde adet üzre, yerli şuralarnıñ deputatları, vazifedarları, cumhuriyet icra akimiyetiniñ vekilleri de iştirak ete. Bundan añlaşıla ki, insanlarımıznıñ şahsiy meselelerine semereli yanaşmağa, çezüv yollarını tapmağa imkân bere.
Er çarşenbe künü Milliy Meclisniñ binasında vatandaşlarımıznı raatsızlağan çeşit meseleler boyunca qabul ötkerilmekte. Ayrı künleri bu qabullarğa 60-80 semetdeşimiz kele.

Zarur olğan sayın qırımtatar kollektivleri ve müessiselerniñ, cemaat, şu cümleden, yaşlar teşkilâtlarınıñ yolbaşçılarınen körüşüvler olıp keçmekte.
Körüşüvler devamında cemaatımız içün emiyeti olğan olarnıñ leyiha ve teşebbüslerine qoltutuv meseleler muzakere etile.
Milliy meslelerimiznen bağlı ve Qırımda, onıñ tışında ötkerilgen kütleviy, aşkâr tedbirlerde – konfereyentsiyalar, “tögerek masalarda” – Meclis tarafından yollanılğan alimler, ekspertler, cemaat erbapları da faal iştirak etip keldiler.

Milliy Meclisniñ bunen ve diger yönelişlerinen bağlı faaliyetii keniş derecede ve acele sürette milliy kütleviy haber vastalarında yarıqlandırılıp keldi. Anna tilimizde çıqqan deviriy neşirler ve söylegen tele-radio muarriyetlerniñ işlerinde bu yahşı körüne.

Bunıñnen beraber, vatandaşlarımıznıñ belli bir qısımı içün milliy meselelerimizge olğan öz noqtai nazarlarını Meclis azalarına yaşağan yerlerindeki toplaşuvlarda ya da iş odalarında ötkerilgen qabullarda degil de – cemaat menfaatı oğrunda beraber çalışqan meslekdeşleri dairesinde beyan etmek, bildirmek müimdir.

Aynı bu maqsatnen 14- aprelde Milliy akademik teatrimizniñ zalında (Aqmescit, Mendeleyev soqağı, 5-nci ev) Milliy Meclis reisi Mustafa Cemilev, onıñ muavinleri Refat Çubarov, Remzi İlyasov, Ahtem Çiygoz, diger Meclis azaları cemaat teşkilâtları vekillerinen, buña merağı ve imkânı olğan vatandaşlarımıznen körüşecekler.

Körüşüv saat 11-de başlanacaq.