Milliy Meclis Ukraina ve Avropa Birligi arasında añlaşma imzalanacağında emin

19 Noyabr 2013

Qırımtatar halqı Meclisiniñ 2013 senesi noyabr 19 künü olıp keçken nevbetten tış toplaşuvında “Qırımtatar halqı Meclisiniñ (Qurultay avaleleri çerçivesinde) qararları, beyanat ve muracaatları aqqında” meselesi baqıldı.

Toplaşuvnıñ başında Meclis azalarını keçenlerde Bağçasaray tarihiy-medeniy qoruqqa şahsiy numizmatik kollektsiyasını ediye etken Amerikadaki qırımtatar diasporasınıñ vekili, belli kollektsioncı Abduraim Demirayaq selâmladı ve qırımtatarlarnıñ vekâletli organınıñ azalarına halq oğrunda mahsuldar çalışma ve doğru qararlar alınmasını tiledi.

Toplaşuv devamında Meclis azaları Avropa Birliginiñ aza devletleri ükümetleriniñ yolbaşçılarına, Ukraina Prezidenti ve Ukraina Yuqarı Şurasınıñ adına “Ukraina ve Avropa birligi arasında Birleşme aqqındaki Añlaşma aqqında” beyanatnı qabul etip, onda şu qalğan bir qaç kün içinde Vilnüs sammiti Avropa Birligi ve Ukraina arasında añlaşma imzalanmasınen yekünlenmesi içün zarur olğan er şeyni yapmağa çağırdılar. Beyanatta denile ki, Meclis em Ukraina, em Avropa Birligi içün elverişli olğan Ukraina ve Avropa Birligi arasında añlaşma imzalanacağında emindir.

Meclis reisi Refat Çubarov mezkür beyanat qırımtatarlar vekâletli organınıñ em halqara seviyedeki, em Ukraina içersindeki epsi ortaqları tarafından beklenilmekte. Bunıñ kibi de toplaşuvda qabul etilgen “Qırımtatar halqı VI Qurultayınıñ Ukraina Prezidenti Viktor Yanukoviçniñ adına muracaatı”nda qırımtatar halqınıñ öz Vatanında aqlarınıñ ğayrıdan tiklenilmesi boyunca halqara forum keçirilmesine qoltutmağa çağırıla.

Muracaatta Ukraina Prezidenti Viktor Yanukoviçke Halqara forumnı keçirmek aqqında qarar 2014 senesi aprel ayına qadar, qırımtatar halqı sürgünliginiñ 70 yıllığı arfesinde alınması rica etile.

Bunıñ kibi de toplaşuvda noyabr 21 künü Meclis azalarınıñ elçilik yolbaşçıları ve Ukrainada akkreditatsiya etilgen halqara teşkilât vekilleri ile körüşüvi meselesi de muzakere etildi. Üçünci sefer keçirilecek bu körüşüvde birinci kere Meclisniñ erkânı tolusınen iştirak etecek. Meclis reisiniñ bildirgenine köre körüşüv devamında halqara işbirlik ve qırımtatarlarnı qaytaruv, yerleştirüv ve aqlarını tiklev işinde Ukrainağa yardım yollarını muzakere etmek planlaştırıla.

Meclis yolbaşçısı şunı da seslendirdi ki, yaqın künlerde eki iş toplaşuv keçirilmesi qararlaştırıldı: noyabr 22 künü regional meclislerniñ reislerinen kenişletilgen seminar toplaşuv ve noyabr 28-de Aqmescit regional meclisniñ kenişletilgen toplaşuvı olacaq.