Milliy Meclis reisi Türkiye Baş naziri ve Türkiye Tış işleri naziri ile körüşti

11 Oktâbr 2013

2013 senesi oktâbr 11 künü Qırımtatar halqı Meclisiniñ reisi, Ukraina halq deputatı Mustafa Cemilev Ankarada Türkiye Baş naziri Recep Tayip Erdoğan ve Türkiye Tış işleri naziri Ahmet Davutoğlu ile körüşti.

Körüşüvler devamında Türkiye ve Ukraina arasındaki munasebetlerniñ vaziyeti, biraz evel Ukraina Prezidenti Viktor Yanukoviçniñ Türkiyege ziyaretiniñ neticeleri, Ukraina cumhurbaşqanı ile söyleşüvlerde qırımtatar meselesi ne derecede ögge sürülgeni muzakere etildi.

Türkiye Tış işleri nazirinen körüşüv aldından Mustafa Cemilev A. Davutoğlunıñ teklifi boyunca onıñ İraq turkmenleri delegatsiyası ile körüşüvine qatıldı.

Türkiye Tış işleri nazirinen ayrıca olğan körüşüvde A. Davutoğlu Mustafa Cemilevge Viktor Yanukoviçniñ ziyareti devamında ukrain delegatsiyasınıñ azaları Ukraina Tış işleri naziri L. Kojara ve Qırım Baş naziri A. Mogilövğa Ukraina ve Türkiye Tış işleri nazirleri, Qırım Baş naziri ve Qırımtatar halqı Meclisi reisiniñ iştirakinde qırımtatar halqınıñ meselelerini muzakere etmek boyunca 4 taraflı körüşüvniñ 2-nci raundını keçirmekni teklif etkenini bildirdi. Belli ki, Ukraina ve Türkiye Tış işleri nazirleri, Qırım Baş naziri A. Mogilöv ve Qırımtatar halqı Meclisiniñ reisi M. Cemilevniñ iştirakinde böyle birinci körüşüv keçken seneniñ oktâbr ayında olıp keçken edi.

A.Davutoğlunıñ söylegenine köre ukrain tarafı böyle körüşüvge itiraz bildirmedi. A.Davutoğlu bu körüşüvni kelecek seneniñ yanvar ayında, Kiyevge OSCE azaları olğan devletlerniñ tış işleri nazirleriniñ körüşüvine kelgende keçirmek mümkünligi aqqında fikirini bildirgen.

Türkiyeniñ ükümran partiyası olğan AKPniñ merkeziy ofisinde Baş nazir R.T. Erdoğan ile olıp keçken körüşüvde esasen Avropa Birligi ve OSCE imayesi altında Qırımtatarlarnıñ problemleri boyunca halqara forumnı keçirmek planlarına dair meseleler muzakere etildi. M. Cemilev Türkiyeniñ Baş nazirine sentâbr 19 künü Aqmescitte Meclis yolbaşçıları ve muhtariyet akimleri tarafından davet etilgen qırımtatar halqınıñ bir qaç vekilleriniñ Avropa Birliginiñ Kenişletüv ve Avropa eyiqomşucılıq siyaseti boyunca Aliy komissarı Ştefan Füle ile körüşüvi, bunıñ kibi de OSCE, AB ve BMT qurumları ekspert gruppalarınıñ qırımtatar problemi boyunca yapqan araştırmaları aqqında malümat berdi.

Meclis reisi Türkiye Baş nazirine araştırmalarnıñ neticeleri boyunca azırlanılğan “Qırımnıñ sürgün etilgen halqlarınıñ qatıluvı” cıyıntığını bağışladı. Taraflar bunıñ kibi de TİKAnıñ Qırımda ömürge keçirgen leyhalarınen bağlı meselelerniñ muzakeresine de diqqat ayırdılar.

Türkiyege eki künlük ziyareti çerçivesinde M. Cemilev Anqarada “Türk Ocakları” ofisinde bulunıp, şu birleşmeniñ sabıq prezidenti, Türkiye parlamentiniñ sabıq deputatı Nevzat Kösoğlunıñ oktâbr 10 künü vefat etkeni munasebetinen baş sağlığı bildirdi. Rahmetli belli siyaset ve edebiyat erbabı olaraq “Türkiyeniñ tışında türk edebiyatı” 32 cıltlıq eserniñ naşiri edi. Bu eserniñ 13-ncı cıltı qırımtatar edebiyatına bağışlanğan edi.